تره‌مپ باس له چاره‌نويس بينس و په‌مپيۆ ئه‌كا وه‌ليا
شه‌فه‌ق نيوز/ دۆناڵد ته‌رمپ سه‌رۆك ئه‌مريكا، ئاشكراى ئه‌وه كرد مايك بنس جيگرى دوباره وه‌ليا كانديد ئه‌كريه‌ێد له هه‌ڵوژاردنه‌يل سه‌رۆكايه‌تى ك ساڵ 2020 ئه‌نجام ئه‌گه‌رێد، يه‌يش ده‌رخست ك دويريش نيه مايك په‌مپيۆ وه‌زير خارجيه‌يش كانديد بكريه‌ێد ئه‌را ئه‌نجومه‌ن پيره‌يل.
تره‌مپ له باسيگ ئه‌را تووڕ هه‌واڵده‌ر "فۆكس" وت: بينس يه‌كيگه له لايه‌نگره‌يل و دووسه‌يلم و باس له‌وه‌يش كرد نيكى هيلى باڵيۆز وه‌رين وڵاته‌يل يه‌كگرتگ له نه‌ته‌وه‌يل يه‌كگرتگيش كه‌سايه‌تييگ وه‌هيزه، وه‌لێ بينس كاريگ جياواز ئه‌نجام داگه.
تره‌مپ له‌باره‌ى مايك په‌مپيۆ وه‌زير خارجيه‌يش وت: خوازياريم په‌مپيۆ كانديد بكريه‌ێد ئه‌را ئه‌نجومه‌ن پيره‌يل له‌بان ولايه‌ت كانزاس له هه‌ڵوژاردنه‌يل نيمچه ته‌شريعى ساڵ 2020، ك هه‌رچه‌نى په‌مپيۆ حه‌ز له پۆسته‌گه‌ى خوه‌ى ئه‌كا، وه‌لێ له حاڵه‌تيگ ئه‌گه‌ر هه‌ڕه‌شه‌يگ ده‌ركه‌فت له‌بان ئه‌وه‌گ كۆماريه‌يل كورسى كانزاس له ئه‌نجومه‌ن پيره‌يل له‌ده‌س ئه‌يه‌ن له هه‌ڵوژاردنه‌يل ساڵ ئاينده ئه‌وه دوير نيه په‌مپيۆ كانديد بكريه‌ێد و سه‌ركه‌فتن گه‌ورا وه‌ده‌س بارێد.
