ترامپ له‌وه‌ر وته‌ێ "خێر و شه‌ڕ" ره‌سيه سعوديه
شه‌فه‌ق نيوز/ شه‌وه‌كى ئمڕوو دوناڵد ترامپ سه‌رۆك ئه‌مريكى ره‌سيه شانشين عه‌ره‌بى سعودى له يه‌كه‌مين گه‌شتيگ خارجى له وه‌ختيگه‌و پۆست سه‌رۆكايه‌تى وه‌رگرتگه.
له‌ى باوه‌ته‌و، ئه‌سۆ شێتد پرێس له زووان ره‌شنويس وتاريگ ك سه‌رۆك ئه‌مريكى ئه‌خوه‌نێده‌وه‌ى له سعوديه وت: دوناڵد ترامپ داواى يه‌كگرتگى ئه‌كا له روى وه‌ڕوى بوينه‌وه‌ى ترۆر له جه‌هان ئسلامى و ئه‌و هه‌وڵه‌يليشه وه هه‌وڵه‌يليگ "جه‌نگ له ناونى خێر و شه‌ڕ " تاريف ئه‌كا.
ئاژانس ناوبرياگ له زووان هه‌مان ره‌شنويس وت: ترامپ له‌ى وتاريه دوير ئه‌گرێد له زووان تون دژ وه ئسلام و جياوازه له‌و زووان هه‌ڕه‌شه‌يله ك له‌وه‌خت هه‌ڵمه‌ت هه‌ڵوژاردن داره‌ێ، وه‌ل دويرگرتن له قسه‌يليگ له‌باره‌ى ديموكراسيه‌ت و مافه‌يل ئاده‌ميزادو باس له‌وه‌يش كرد ك ترامپ ئويشێد: ئيمه ئه‌را ئه‌وه ناتيمنه بويشيمنه ملله‌ته‌يل تر چوين ژيه‌ن و چه ئه‌كه‌ن و ئيوه كيين، ئيمه ئه‌را ئه‌وه هاتيمنه شه‌راكه‌ت پيشكه‌ش بكه‌يم ئه‌را بنياتناين ئاينده‌ێ خاستر ئه‌را گشتلايگمان و ئاماژه وه‌يه‌يش كرد ك سه‌رۆك ئه‌مريكى له‌ى وتاره داوايش راوناين ترۆر له شوونه‌يل خوداپه‌رسى ئه‌كا له سه‌ركرده‌يل عه‌ره‌ب و موسڵمان.
