تەندروسی جەهانی هوشداری لە پەتای مەرگبار کۆلێرا لە کەێد لە لوبنان

شەفەق نیوز/ لە وەخت زوییگ لە مانگ گوزەشتە، یەکەمین تویشهاتن وە کۆلێرا لە لوبنان توومار کریا، لە وەختیگ وڵاتەگە رمیان ئابووری وەخوەی دوینێد، ک توانای شوینەیل گشتی لە پیشکەشکردن خزمەتگوزاری سەرەکی کەمەو کرد.

ریخریاگ تەندروسی جەهانی، هوشداری لە بڵاوبوین زوویگ پەتای کۆلێرا مەرگبار لە لوبنان، لە وەختیگ سوریای هاوساییش رەنج لە روی بڵاوبوین ئی بیماریە دەێد.

ریخریایەگە لە بەیاننامەیگ وت: هوشداری لە زاڵبوین کۆلێرای مەرگبار لە لوبنان کەێد وەگەرد زیایبوین تویشهاتنەیل.

عەبدولناسر ئەبو بەکر نوینەر تەندروسی جەهانی لە لوبنان وت: رەوشەگە لە لوبنان تورت و شلە، ک وڵاتەگە رەنج لە نواگردن قەیرانەیل دەێد، و ئی قەیرانەیلە کاریگەرییان دووقاتەو بوود لەوەر شیواشیو سیاسی و ئابووری ک یە ماوەی درویژیگە وەردەوامە.