تەندروسی جەهانی: هاتێ شمارەی زەرەدمەنەیل زەویلەرزەی تورکیا و سوریا بڕەسێدە ٢٣ مەلیۆن کەس
2023-02-07T11:13:19+00:00
شەفەق نیوز/ ریخریاگ تەندروسی جەهانی، ئمڕوو سێشەممە، مەزەنە کرد شمارەی زەرەدمەنەیل زەویلەرزە مەرگبارەگە لە تورکیا و سوریا بڕەسێدە ٢٣ مەلیۆن کەس.
ئەدیلهاید مارشانگ خانمە وەرپرس لە ریخریاگ تەندروسی جەهانی لەوەردەم دەسەی جیوەجیکردن لە ئاژانس سەروە نەتەوە یەکگرتگەیل وت: نەخشەی رویداوەیل نشان دەن شمارەی ئەو کەسەیلە ک هاتێ لە زەویلەرزەگە زەرەدمەن بوینە رەسێدە ٢٣ مەلیۆن کەس، و پەنج مەلیۆن لەلیان هانە رەوشەیل بەدیگ.
وەگورەی فرانس پرس، وەڕیەوبەر ریخریاگ تەندروسی جەهانی، ئمڕوو سێشەممە، نیگەرانی ریخریایەگە لەبان ناوچەیلیگ لە تورکیا و سوریا نشان دا، و هویچ زانیارییگ لەلیان نەڕەسیە، لەوەختیگ ئەو زەویلەرزەیلە بوی ک گیان هەزاران کەس رفان.
تیدروس ئەدهانۆم گیبریسوس لە گردەوبیون ئەنجومەن جیوەجیکردن لە جنێڤ وت: وەشیوەیگ تایبەت نیگەرانیمن لەبان ئەو ناوچەیلە ک هیمان زانیاری لەلیان نەڕەسیە.
ئامار قوربانیەیل ئەو زەویلەرزەیلە ک دویەکە دووشەممە دادە باشوور تورکیا و باکوور سوریا، رەسیە ٥٠٢١ کوشیاگ.
