تەقیان بەیجەر.. باڵیۆز ئیران چەویگی لەدەسدا و ئەوەکە زەخمدارە
شەفەق نیوز/ راپۆرتیگ لەلایەن رووژنامەی نیویۆرک تایمز ئەمریکی، ئمڕوو چوارشەممە، ئاشکرا کرد کە باڵیۆز ئیران لەلای لوبنان یەک چەوی وەتەواوی لەدەسدا، و ئەوەکەی زەخمدار سەختیگ بوی، لە ئەنجام تەقیان ئامێرەیل وایەرلێز پەیوەندیکردن (بەیجەر) لە بەیروت.
وەرجەیە خەوەر لە زەخمداری موجتەبا ئەمانی باڵیۆز ئیران لەلای لوبنان رەسی، لەناو ئۆپراسیۆنیگ کە بوختی وە ئیسرائیلەو کریاس، کە هەزاران ئامێر بەیجەر لە ناوچەیلیگ جیاجیا لە لوبنان وەیەکەو تەقیانەو، کە بویە هوکار کوشیان ٩ کەس، و زەخمداری نزیکەی ٢٨٠٠ کەس.
نیویۆرک تایمز وتیش: ئەمانی یەک چەوی وەتەواوی لەدەسدا وەو تەقیانە، و ئەو چەوەگەی زەخمداری سەختیگ بوی.
راپۆرتەگە وتیش: زەخمەیل ئەمانی فرە رخدارتر بوین لەوەگ دەسەڵاتەیل ئیران ئاشکرای کردن، و ئەرا تەهران بریا.
حسێن سولەیمانی سکرتێر رووژنامەوانی سایت خەوەری"مەشرق" سەروە سوپای پاسداران لەباوەت زەخمەیل باڵیۆز لە پۆستیگ وەبان ئێکس نویسان: بەدبەختانە، زەخمەیل باڵیۆز ئیران فرە رخدارە و چەوەیلی تویش هاتنە.
پارچە ڤیدیۆییگ کە میدیایل خەوەری بڵاوی کردن نشان دا هەناێ ئەمانی لەناو یەکیگ لە جادەیل بەیروت ئەرا خەسەخانە بریەێد، و ژاوەژاویگ لەناو جادەگە هەس، و چەوەیلی پووشیاس و وەردەم شەویەگەی پڕ لە خوینە.
