برادەرەیلی کوشتگە و خواردیەسەیان.. زیندان هەتا هەتایی دژوە تاوانکاریگ رووسی
شەفەق نیوز/ دادگای باڵای رووسی، ئمڕوو جمعە، فەرمان زیندانکردن هەتا هەتایی لەبان پیاویگ رووسی دا، وەتاوان کوشتن سێیان لە برادەرەیلی و خواردن پارچەیلیگ لە لەشیان.
وەگورەی راپۆرت رۆژنامەی «دەیلی مێل» بەریتانی، ئیدوارد سبلیزینێف لە تەمەن ٥١ ساڵان وە کوشتن سێ برادەری لەماوەی ناونی ئادار ٢٠١٦ و ئادار ٢٠١٧ تاوانبار کریا.
سبلیزینێف ک ناسریاگە وە گووشت ئایەم خووەر، ئاشکرا کرد ک وەچەقو داگەسە ئەو برادەرەیلیە ک تەمەنیان هالە ناونی ٣٤ و ٤٣ و ٥٩ ساڵان، تا مردن هەنای لە سەرەخوەشی بوینە، و ئیجا پارچەیلیگ لە لەشیان کوڵانگە و خواردیەسەیان.
سبلیزینێف قوربانیەگان ک ناوەیلیان ئاشکرا نەکریا، پارچەی لەشیان کرد و ئەو بەشە گوشتەیلیە ک ئەرا خواردن خوازیە لەناو کیسەی پلاستیک هەڵکردگە، و ئەو بەشەگان فڕە داگەسە ناو چەمیگ لەو ناوە.
وەگورەی لێکۆڵینەوەگان، سيلیزینێف چگەسە ناو ماڵ یەکیگ لە قوربانیەگانیانی دویای کوشتن و خواردنی، و وەتگەسە داڵگ و باوگ پیاوەگە ک کوڕەگەیان چگەسە کار لە شاریگ تر، و خود باسەگە ئەرا ئەفسەرەیل پۆلیس وتگە هەنای دەسکردنە لێکۆڵینەوە لەباوەت گومابوین پیاوەگە، و ئەو دوو قوربانیەگە خیزان نەیاشتنە تا بکەفنە مینەیان.
دادگاگە هەمیش ئاشکرا کرد ک سبلیزینێف پشی و سەگ و وهەرچە لەو باڵندە و ئاژەڵەگان تر لەناو جادەگان کەفتیەسە وەر دەسی کوڵانگە و خواردگە، و هەنای تەرمەیل قوربانیەگان پەیا کریان، پۆلیس دووپات کرد ک تەرمەگان پارچە کریانە و گەنیانە، و وەسەختی ناسیریەن.
پزشکە دروینیەگان دووپات کردن ک تەندروسی مەغزی خاسە و خوەی وەتەواوی لە کوشتن و خواردن برادەرەیلی وەرپرسە.
جی باسە ک وەرجەیە سبلیزینێف ١٣ لە زیندانی گوزران کردگە لەوەر تاوانیگ کوشتن وەرینی.
