ژاوەژاویگ لە مۆسکۆ دویای ئەوەگ فەرماندەی ڤاگنەر یاخیبوینی لە فەرماندەیی سوپای رووسیا راگەیان
لە پارچە ڤیدیۆیگ دەرکەفتیە کە ماشینە سەربازییەیل رووسیا لە جادەیل مۆسکۆ جویلن، یەیش دویای راگەیانن دەزگای ئاسایش فیدراڵی رووسیا، وازکردن دۆسیەیگ تاوانکاری لەبان فەرماندەی "ڤاگنەر" وە توومەت "بانگەوازکردن ئەرا یاخیبوبن چەکداری"، و دەرچگن فەرمان دەسگیرکردنی، لە وەختیگ فەرماندەی "ڤاگنەر" یڤگنی پریگۆژین راگەیانیە، سەربازەیلی لە سنوور ئۆکرانیا وەرەو ناوە رووسیا رەد کردنە و راگەیاننە "هەرکەسیگ ڕیگری بکەێد لەناوی دریەێد".
و ئاژانس خەوەری "تاس" لە زوان دەزگایگ ئەمنی وت: ریکارە ئەمنیەیل لە ئیوارەی رووژ جمعە، لە بارەگایل حکومەت و دامەزراوەیل گواستنەوە و شوینە گرنگەیل مۆسکۆی پایتەخت رووسیا سەختەو بوینە.
سەرۆک شارەوانی مۆسکۆ لە تووڕ کۆمەڵایەتی تێلێگرام نویساد، لە ژیر رووشنایی ئەو زانیارییەیلەگ وە دەسمان کەفتیە، چالاکییەیل دژە تیرۆر لە مۆسکۆ وە ئامانج قایمکردن ریکارەیل ئەمنی کار کەن.
پارێزگار ناوچەی لیپێتسکی رووسیا کە کەفێدە ٤٢٠ کم وەرەو باشوور مۆسکۆ، دویای ئەوەگ گروپ "ڤاگنەر" یاخیبوینیان راگەیان، قایمکردن ریکارەیل ئەمنی"ی راگەیان.
ئیگۆر ئارتامۆڤ لە تەلەگرام نویسان: گرنگی تایبەت وە مقیەتیکردن ژیرخانی گرنگ دریەێد، داوا لە دانیشتگەیلی کرد ئارام بوون و خوەیان لە گەشتکردن وەرەو باشوور وەروو ناوچە سنوورییەیل رووسیا وەرد ئۆکرانیا دویر بگرن.
رووژ شەممە، پارێزگار ناوچەی رۆستۆڤی رووسیا داوا لە دانیشتگەیل ناوچەگە کرد لە ماڵ بمینن.
ڤاسیلی گۆلوبێڤ لە تووڕ کۆمەڵایەتی تێلێگرام نویسان: "هیزە ئەمنییەیل گشت ریکاریگ خوازیاگ جیوەجی بکەن ئەرا دڵنیابوین لە بیوەیی دانیشتگەیل ناوچەگە، داوا لە گشت لاییگ کەم ئارام بوون و ئەگەر خوازیاگ نەوود لە ماڵ دەرنەچن.
وەرجەیە، فەرماندەی گروپ "ڤاگنەر"، یڤگنی پریگۆژین، راگەیاندوێد، سەربازەیلی ک شمارەیان 25 هەزار، لە ئۆکرانیاو سنوورەگە وەرەو رووسیا رەد کردنە، وتیش: رەسینەسە رۆستۆڤ و هەر کەسیگ ری لەلیان بگرێد لەناوی دەن.
