ڤاتیکان یەکەمین وینەی پاپا لەناو خەسەخانە بڵاو کەێد

شەفەق نیوز/ ڤاتیکان یەکەمین وینەی پاپا فرانسیس لە وەختیگ کەفتە قەیران تەندروسی بڵاو کرد، کە لەناو وینەگە دیار بوی لەبان کورسی جویلەکەر نیشتیە، و پڕتاڵ چەرمگ و سال وەنەوشەیی پووشیە.

 پاپا تەمەن 88 ساڵە، لە 14ی شویاتەو، وەردەوامە لە وەرگردن چارەسەری لە خەسەخانەی جیمیلی لە رۆمای پایتەخت ئیتاڵیا.

وەگورەی راپۆرتەیل، وینەگە دویای نمازیگ کە لەناو کلیسای ناو خەسەخانەگە گریا، کە پاپا تویش بەدترین قەیران تەندروسی هاتگە لە وەختیگەو پۆست پاپایی وەرگردیە، و لەناو وینەگە دیار بوی کە کەسیگ لە شانیەو نییە، و هویچ لویلەی ئۆکسجین یا ئامێر هەناسەدان دەسکرد لەقەیەو نییە.

  ڤاتیکان وت: تەندروسی پاپا ئارامییگ وەرچەو توومار کرد، و دی ئامێر هەناسەدان نیەخوازێد، کە دەسنشان خاسەوبوین کەمەکم لە تەندروسیی کەێد، دویای تویشهاتنی وە هەوکردن سویەی دووانەکی.

وەرجە نزیکەی دوو هەفتە، ڤاتیکان وت: تەندروسی پاپا وەرەو خاسی چوود، وەلێ مەوقەیگ ئەرا دەرچگنی لە خەسەخانە دیاری نەکرد.