ئاڵشتبوین کەشوهەوا گیان سەدان سینێد و رخیگ لە بانان دیرێد
وەگورەی سایت فرانس ٢٤؛ ئەو گەرمی سەختە کە چوار کیشوەر گرێدەو وەگەرد سەرەتای وەرز تاوسان لە نیمەی باکوور زەوی، رخ کاریگەری ئاڵشتبوین کەشوهەوا زیای کەێد، کە لەی رووژەیلە، بەرزەوبوین پلەی گەرمی بویە هوکار مردن سەدان کەس لە ئاسیا و ئەورووپا، و لە سعودیە سەدان حاجی لەوەر گەرمی ئەویان ٥١ پلە گیانیان لەدەسدان، و دەوڵەتەیل کەیاری ناوڕاسیش داد لە دەس ئاگر دارسانەیل کەن، و گەرمی لە هندستانیش ٤٠ کەس بیمار کرد و ١٢ج کەسیش کوشت، و لەی رووژەیل کەمە، گومان هەس بەرزەوبوین پلەی گەرمی سەدان یا هەزاران لە شوینەیلیگ جیاجیا لە ئاسیا و ئەورووپا کوشتیە.
دەوڵەتەیل دەریای ناوڕاس، هەفتەیگ ترەک لە گەرمی وەخوەیان دین کە دارسانەیلیگ لە پورتوگال تا یۆنان سزیان، و وە درویژایی کەناراوەیل باکووری ئەفریقا لە جەزائیر.
لە سربیا، پسپۆڕەیل کەشناسی مەزەنە کەن پلەی گەرمی بڕەسێدە نزیکەی ٤٠ پلەی سەدی لەی رووژەیل بانانە.
لە مۆنتینیگرۆ، دەسەڵاتەیل تەندروسی تەمەی کوردم دان لە سا بمینن تا ماوەی دویای نیمەڕو.
ئەوروپا ئمساڵ بیسەروشوینی و مردن گەشتیارەیل وەخوەی دوینێد، لەناو پلەی گەرمی رخبەریگ، و لە ئەمریکا ناوچەیل باکوور خوەرهەڵات و خوەرئاوای ناوڕاس کە وە گومەزی گەرمایی ناسیاس زیان دوینێد، و هوشداری ئەرا زیاتر لە ٦٨ ملیۆن کەس لە کاریگەری گەرمی دەرکرد.
لە هندستان کە تاوسانەگەی لە ئادار تا ئایارە، ئیجا واران وەرزی گەرمیەگە سووکەو کەێد، نیودیلهی رووژ چوارشەممە سەختترین شەو گەرمی لە ٥٥ ساڵ تا ئیسە توومار کرد، کە پلەی گەرمی رەسیە ٣٥.٢ پلەی سەدی.
هەمیشە شەوانە گەرمی داوەزێد، وەلی زانایەیل دووپات کەن کە ئاڵشتبوین کەشوهەوا شەویش گەرمەو کەێد.
