پەیاکردن کابرایگ جەزائیری وەرجە ٣٠ ساڵ هاوساگەی رفانیەسەی
وەگورەی سایت (ئیرەم نیوز)، ناوچەی قەدید سەروە ویلایەت جلفە لە جەزائیر، پەیاکردن گەنجیگ وەخوەی دی، کە لە کۆتایی نەوەتەیل سەدەی گوزەشتە رفیاگە، کە لەو مەوقە تەمەنی ١٦ ساڵان بویە.
ئەو کابرا وەناو بن عومران لەناو چاڵیگ پەیا کریا کە وە کەی بانی پووشیاس، و توانای قسەکردن نەیرێد.
پولیس زانیاری کوڵیگ لەو رویداوە ئاشکرا کرد کە وت: ئاگاداری وەلایەن برای رفیایەگە ئەرای رەسیە، کە گومان لە چشتیگ لەناو تەویلەی پەس هاوساگەی دیرێد.
وتیش؛ دویای ئەوە هیزەیل ئەمنی رەسینە ماڵەگە، و ئەو کابرا پەیا کریا کە وەرجە ٣٠ ساڵ بیسەروشوینە، و خاوەن ماڵەگە دەسگیر کریا.
وەگورەی قسەی هاوسایل، داڵگ رفیایەگە لە خەفەت ئی کوڕە مردگە، وەلێ وتیاد سەگ کوڕەگەم هەر لەلای ماڵ هاوساگە وسێد، کە لەو وەختە گومانیگ داشتیە.
هاوسایل وتنیش: توومەتبارەگە وە تەنیا لەناو ماڵەگەی نیشتیە و ژن نەیرێد، و دویای ئاشکرابوین کارەگە، مەردم کەفتنە فتراق ئەوە کە سەگ رفیایەگە لەلای ماڵ تاوانبارەگە وسیاد، و دیارە کە هاوسا بڕفنەگە رخی چگە ئی سەگە رسوای بکەێد، ئەراوە ژەهرخوەری کردگە و کوشتیەسەی.
وەگورەی رووژنامەی (ئەلخەبەر)، رفیایەگە وتیە: لە پشت پەنجەرە نووڕیام، وەلێ نەتوەنستیە باێدەو ئەرا ماڵ خوەیان، وەلێ چماێ کەسیگ دەس و پام و زوانم بەساس، و لە گشت چشتیگ ئاگادار بویە، و دویای ئاشکرابوین ئی رویداوەیلە کەسەیل فرەیگ مەزەنە کردن کە جادوو وەبانی کریاس.
