کورد فه‌یلی و هه‌ڕه‌کیشه‌کی جنسیه ده عراق
شە‌فەق‌نیوز- کورده‌یل فه‌یلی، هه‌ر چه‌ن ک وه بوونه یه ک هه‌میشان و وه‌ر ژه گشت هووز و عه‌شیره‌یل عه‌راو و تورکه‌مان و ئاسووری و حه‌تا ئه‌و دووه‌ی کورده‌یل سووران و ئێزه‌دی و کرمانج، دانیشته و زایه‌ی عراق بینه و هه له ئه‌وساوه ئی به‌شه له کورده‌یل فه‌یلی وه "کورد حه‌مرین" و "کورد ده‌جڵه" و "کورد فه‌هڵه‌وی" یانێ هن وڵات "فه‌هڵه/ په‌هڵه/ پاڵه" ک به‌غدا گه‌وراشار و ناوه‌ندێ بییه، نام ده‌ر کردنه، و له بنه‌ڕانه‌ره‌یل "عراق ئه‌وسا" و "عراق ئێسا بینه" وه‌لێ ئاخینمانه، ک ده چه‌ن ده‌وران، دوفێشتر که‌تی‌وه‌تی فره‌ی وه سه‌رێیان هات و سوته‌زار و ئاواره کریان و کوشت و بڕ.
ده ئی سه‌د ساڵ دۆمایینه ک ده ئێران و عراق، ناسنامه گرتن و جنسیه بڕین هاته دیار، بڕێ له کورد فه‌یلی بێ‌به‌ش مان و جوور که‌سێ ک دوور ژه گیان، له دو مه‌سجد بێ‌نماز ده‌رچووگبی، ده ئێران وه بوونه‌ی یه ک عراقی هساو دکریان و ده عراقیش وه سنگ یه ک ئێرانی وه‌یان دوتریا، بێ‌جنسیه مان و له هه‌ردو وڵات و ده نام خاک کورد فه‌یلی خوه‌ی، سه‌رێیان وه بێ‌کڵاو ما بینه هه‌کاتی کابراگه ک وت : "خوه‌م بیمه وه بێگانه‌و بێگانه خاون‌ماڵه" یا "ده‌‌ره‌کی هات و ناوه‌کی کرد وه ده‌ر".
ده ئی وتاره ک کوڵبڕه‌‌گه‌ی وه فارسی و ئنگلیسی ئه‌ڕاتان نریاگه و فایل PDFه‌گه‌ییش وه فارسی خریاگه ده ئارشیڤ شەفەق، دوکتور موراد مورادی‌موقە‌دەم، وە شێوەیێگی زانستی، باس کێشە‌ی جنسیە‌ی کورد فەیلی دە عراق دکەێ.
دوکتور موراد مورادی‌موقه‌دم، له کورده‌لییه‌یل ئێڵ کورد په‌هڵه‌ی دێهلوڕان، مه‌قاڵه‌ی فره بهه‌رزێ ده بان کورد فه‌یلی چاپ کرد.
دوکتور مورادی‌موقه‌ده‌م، ره‌ییس ئ‌و ده‌وره‌ی شه‌ورای شار کوردنشین دێهلوڔان بی ک فه‌وق لیسانس و دوکتوراگه‌ی تاریخ خوی وه گه‌رد دو تز ده بان کورد فه‌یلی گرت.
دوکتور موراد، تا ئێسه زیاتر له چه‌نی‌چه‌ن مه‌قاڵه‌ی زانستی، کتاو فره خاسێ وه نام "وه‌ز و وه‌زیات کورد فه‌یلی ده ده‌وران والییه‌یل پێشتکۆ ئیلام"یش بڵاو کردگه.
ئیوه دتوانن فایله PDFەگەی ئی وتارە دە بەش ئارشیڤ شەفەق بکەنە دی و بخوەننەی.
