گوڵوەنی، بانسەریێگە گەور و سێ هزار ساڵە
شەفەق نیوز- گوڵوەنی ک بانسەری و دەور مل ژنەێلە و لەچک سەر ئەوساوین پیاگەێل زاگڕوسی بییە فرە گەور و هن سێ هزار ساڵ وەر ژە یەسە و میژووەگەێ ئەڵگەردێ وە دەوران کاسییەێلەگە.
جووراجووری دە رەنگ و سەیینی و رەیینییەگەێ وەختێ ک دنیشێ ئەڵە بان سەر یان دەور مل یا دە بان تێوڵ ژنە زاگڕوسییەێلە، خوەێ چۆچشتێ منێگە سەمبوڵ یەکییەتی و ئەو یەک ماین گشتێیان.
خاسە ک بزانن؛ ئی دومادوما دوارە پیاگەێلەیش ئەڕا ئەڵڕازانن پرتاڵەێلەیان، گوڵوەنی وە قەێ خوەیان دجەڕنن و فرەتر دە ئائین و کارەێل گەپ میللی، حەماسی و کوردیاتی ئی کارە دکەن.
یەیش خووە بزانن؛ هەر چەن ک گوڵوەنییەێلە، فرەتر وە رەنگ سییە و گوڵ‌گەچی چەرمگ دناسرن و دە سوور و داوەت و جەژنەێلە گشتێ فرەتر ئیجوور گوڵوەنییەێلێ دبەسنە سەرێیان باوجی وەێجوورەیش جی کەفتگە ک گوڵوەنی رەش فرەتر هن کامڵەژنەێلە و ساراژنەێلەسە و نمام و نوونمامەێلەیش فرەتر رەنگەێل شاد و زقێ جوور سەوز و کاو و زەرد وەگەرد گوڵەێلێ رەنگی و ئسپێ دکەنە سەرێیان هەمجا دە پرسە و چەمەر دپووڕێ بویشیمن ک ئەوسا گەپ و بووچگ یا فووتە و حەبەر و قەترە دپووشینە یا گوڵوەنییەێلێ رەش‌کار.
هەرچەن ک گوڵوەنی وە بانسەریێگ کوردی دناسرێگ و هە زاگڕوسییەێلە دکەنەێ سەر، وەداخەوە هێمان دە کوردەواری کارگا و کارخانەێ ک جوور مەڵوەن دوروس کردن گوڵوەنی بناسرێ نەنریاگە و گوڵوەنییەێلە فرەتر هن کاشان و قومن.
دە جارانیش هە لەێ‌وا بییە و حەسەن زیرەک، گوورانی‌بێژ گەورای کوردیش دە گوورانییەگەێ (ئامینە گیان) وەێجوورە چڕییەسەو (شەدەکەی سەرت کاری کاشان) یان کاری تاران.
شەدە و گوڵوەنی، هە یەکێگن.
