کرماشان.. پەیاکردن ئاسەواری ناوازە و نوویگ تەمەنی لە یەک ملیۆن ساڵ فرەترە

شەفەق نیوز/ راپۆرتیگ رووژنامەوانی ئیرانی، ئمڕوو چوارشەممە، خەوەردا کە ئەو ئاسەواری کوینە کە لەی دویاییە پەیا کریا نشان دەرد کە ئایەم لە ناوچەی کوردنشین کرماشان وەرجە زیاتر لە یەک ملیۆن ساڵ بویە، و دووپات کرد کە بایەسە ئی ناوچەی کە رووبەری 330 هکتارە بکریەێدە موزەخانەی ئاسەواری. 

راپۆرتیگ لەلایەن رووژنامەی "باختر" ئيرانی، کە ئاژانس شەفەق نیوز ئەڵگەردانی کرد، لە زوان سەجاد عەلی بەیکی وەڕیەوبەر پەیمانگەی ئاسەواری ئیرانی وت: ناوچەیل کویە لە زاگرۆس ناوڕاس ئەرا بڕە راوچیەیل وەرجە هەزاران ساڵ ئارام بویە، چوینکە بڕیگ ئەشکەفت و شوین ڕاوکردن لەی ناوچە هەس.

دیاری کرد کە شەوانە چیانە ناو ئەشکەفتەیل، و رووژانەیش چیانە شوینە وازەیل.

عەلی بەیکی وتیش: دیارە تا ماوەی درویژیگ، زیاتر لە یەک ملیۆن ساڵ، مەردم سەردەم سان کوینە لەی ناوچە بوینە، و چەن جاریگ هاتنەسە ئی شوینە تا سان لەلی بوەن، و تیشە و کەرەستەیل راوکردن دروس بکەن.

وتیش: کارەیل ئاسەواری لەی شوینە وە دوو گام وەڕیەو چوود، یەکەمیان 60 تیشەی سان پەیا کریا کە تەمەنیان لە یەک ملیۆن ساڵ زیاترە، وەلێ وەی دویاییە هەزاران کەرەستەی راوکردن سەنگی پەیا کریا.

 دیاری کرد کە بیگومان ڕووبەر ئی ناوچە وە 80 هکتار مەزەنە کریەێد، وەلێ هاتێ بڕەسێدە 300 هکتار.

لەباوەت میژوو بویین ئایەم لە کرماشان، بایەسە بویشیمن، توێژینەوەی نوو باس ئەوە کەێد کە ئایەم وەرجە زیاتر لە یەک ملیۆن ساڵ لە کرماشان بویە.

عەلی بەیکی وتیش: وەرجە ئی لێکۆڵینەوەی ئاسەواریە، ئیجویر نموونەیگ لە هویچ بەشیگ لە ئیران نەویە، هەرچەن ئاسەواری کەمکەمیگ لەیجویرە وەشیوەی چویچیای و کەم بویە، کە تەنیا یەک چشت ڕاوکردن لە یەی شوین پەیا کردیمنە، وەلێ لێرا زیاتر لە 60 تیشەی سان و هەزاران پارچە لە کەرەستەیل سان پەیا کریا کە تەمەنیان لە یەک ملیۆن ساڵ زیاترە.