ئەڵگەریان "خەون و خێیاڵ" گیلگەمش وە عراق
شەفەق نیوز/ ئامریکا، بەشێ لە قوڕنووسیاگەێ گیلگەمش ک یەکێ لە کوانەترین نووسریاگەێل موقەدەس دنیا بییە وە عراق، گلەو دا.
ئی قەڵ خەڕگە، مەتەڵ ئەساترییێگە لە مەوجوودێگ نیمەخودایی وە نام "گیلگەمش" ک خوەێ شێعر دریژێگە و بەشێ لە ئەدەبیات سوومرییەێلە ک 3600 ساڵ وەر ژە یە وە ڕێنووس بزماری نووسریاگە و کوانەترین حەماسەێ دنیاسە.
دە بشێو بشێو نام‌بەێن ئەڵپێچیان عراق وە شەڕ کەنداو فارس، دە ساڵ 1991 زایینی ک مووزەێلەێ عراق وە تاڵان چگن، لە عراق دزریا و بریا وە ئامریکا.
دە ئی بیس ساڵە ک چگ، ئی لەوحە وە جەوازەێلێ درووکانی، نمایێشت دریا.
بەش‌بەشێ لەێ حەماسە دە کتاو ئەێت عەتیق یەهوودییەێلەێش، یەکجوورەێلێ ئەڕا خوەێ، هاتگە.
ئی قوڕنووسریاگە وە زوان ئاکدی نووسریاگە ک دە بان لاپەڕەێلێ خەڕگین، ئەوەێش وە قوڕ حڕ یا رۆس نووساننەسەێ ک دە نام‌دۆئاوان "بین‌النهرین" ئەوسا باو بییە.
دە ساڵ 1835 زایینی دە هەرێم کوردستان، دە لاژۆر عراق، دوانزە لاپەڕەێ قوڕ و خەڕگین کریا وە دی ک هن کتاوخانەگەێ "ئاشوور بانی‌پاڵ" پاتشای ئاشوور بین و دە بان ئەوانە ئی حەماسە خوەنستن‌وە.
ئی حەماسە، باس گیلگەمشە ک پاتشاێ راسکانی "ئیرووک" بییە. ئەوە خوەێ نام دەوڵەتێگ گەپ و قەوین بییە دە لاخوار ئمڕووژ عراق ئوو وتنە ک نام "عراق"، گوڕدریاگ "ئیرووک"ە.
ئی پاشایەتییە هن 2500 تا 2800 ساڵ وەر ژە یەسەو خوەێ پیاگێ نیمەخودایی بییە ک زوور و کاریزما ئوو نیمەخودائیەگەێ خوەێ لە داڵگێ وە میرات رەسییە وەێ.
