ڕووڵه نه‌چوو سه‌ور هات
2010-08-08T13:30:04+00:00
ته‌وره ده‌سه‌یل كار كه‌ن
مه‌لویچگه‌یل باركه‌ن
شین له‌ش داركه‌ن
ته‌قه‌ى ده‌م ته‌ور هات
ڕووڵه نه‌چوو سه‌ور هات
ساتى نه‌نیشتم له لاد
زكر زووانم دوعاد
تاڵه ك گرتم ئراد
هه‌ر هه‌ڵه‌ت و كه‌ور هات
ڕووڵه نه‌چوو سه‌ور هات
عشق ده‌سى خالیه
جایگ ئرا دل نیه
له‌ى زه‌وى سه‌رد و سیه
هه‌ر به‌شمان جه‌ور هات
ڕووڵه نه‌چوو سه‌ور هات
ڕوو وه ڕى بى كه‌سى
بخچه ئرا كوو به‌سى
وا ك له ئه‌وره و ڕه‌سى
مشت سیه‌ى به‌ور هات
ڕووڵه نه‌چوو سه‌ور هات
ڕه‌زا مه‌وزوونى
