چوی هيلمه‌د وه‌يره بچى

چوی هيلمه‌د وه‌يره بچى

تو هه‌ور ئاسمان كه‌وى

تو نه‌قش قالى و نه‌وى

تاج سه‌رى نوير چه‌وى

ئه‌روسه‌گه‌ى مانگه شه‌وى

چوی هيلمه‌د وه‌يره بچى

واران ناز ناو وه‌هار

ته‌ك داره‌گه‌ى ناو سه‌وزه زار

بالا بلين وينه‌ى چنار

قرمزی ميوه ي هه نار

چوى هيلمه‌د وه‌يره بچى

شكوفه‌گه‌ى قه‌ى داره‌گان

نازاره‌گه‌ى ناو مالمان

گه‌ورا تره‌ك وه ئاسمان

چه‌و مه‌سه‌گه‌ى شيرين زوان

چوی هيلمه‌د وه‌يره بچی

په‌روانه‌گه‌ی هه‌فتا و دو رنگ

قه‌شه‌نگ تر ئه‌و هه‌ر چی قه‌شه‌نگ

شيرين و ناز و شوخ و شه‌نگ

دنيا وه سه‌ر تو هاله جه‌نگ

چوی هيلمه‌د وه‌يره بچی

تو نوير نوير ماڵمی

تو رووژ و مانگ و ساڵمی

هه‌نار و پرتقاڵمی

هه‌واڵگر هه‌واڵمی

چوی هيلمه‌د وه‌يره بچی

به‌رزی به رز بان په‌راو

تاف زلال ناو سراو

خوه‌ش مه‌سيه‌گه‌ی جام شراو

چه‌و كه‌وه‌گه‌ی ده‌يشت زه‌هاو

چوی هيلمه‌د وه‌يره بچی

سوسه‌ن و ياس و نه‌سته‌ره‌ن

مُشك خوه‌ش ده‌يشت خُته‌ن

دوير بوو له ليد چه‌وه‌يل گه‌‌ن

بخه‌ن ده‌ردد وه ليم بخه‌ن

چوی هيلمه‌د وه‌يره بچی

ده‌رد دڵم وه لای خوه‌ده

ده‌رد دڵم ئه‌رای خوه‌ده

ده‌رد دلم وه پاي خوه‌ده

ده‌رد دلم جيای خوه‌ده

چوی هيلمه‌د وه‌يره بچی

تو چويز دار بايه‌می

تو هوورييد كه‌ی ئايه‌می

ته نيا تنی سه‌رمايه‌می

وه‌ی خوه‌ر داخه سايه‌می

چوی هيلمه‌د وه‌يره بچی

تو هه‌ر چی خوه‌زيه‌وه‌يلمی

خه‌و خوه‌ش خه‌وه‌يلمی

بينايه‌گه‌ی چه‌وه يلمی

هه‌ساره‌گه‌ی شه‌وه‌يلمی

چوی هيلمه‌د وه‌يره بچی