په‌ژاره و ئاره‌زوو
هه‌ردگمان دویر نییم دیاره له‌یه‌كه‌و
ده‌نگمان ها له‌یه‌ك ئه‌ر ڕووژه ئه‌ر شه‌و
شعر ئاره‌زوو من ئه‌را تن نویسام
بزان ناوه‌گه‌د چه‌ن به‌رزه له‌لام
تن ئه‌گه‌ر بزانید چه‌نى كه‌ساسم
نه فكرم ماگه و نه‌یش كه‌سى ناسم
شه‌وان هام له هویر نه‌زم ئحساسم
چه‌جوورى نزیكه‌و بووم نازار بناسم
كه‌فتمه له‌ى هویره و له ئى خه‌یاڵه
شعر و نویسینم گشتى به‌تاڵه
بیلا ڕه‌حمد باى كه‌مى وه حاڵم
زانى ئه‌راد چوینم هه‌ى یار زاڵم
خوه‌م ته‌وبه‌كارم له‌ى به‌زم و ڕه‌زمه
پیه‌ڵه‌م وه‌ره‌و لاد دیاره وه نه‌زمه
دڵم ئویشیگه پیم یه هاوڕازده
چاره‌سه‌ر كه‌ر قاپى وازده
دڵ ئویشیگه پیم ئه‌راى خه‌مین نه‌و
مه‌ر تن كول شه‌وى نیه‌وینیده‌ى وه‌خه‌و
چه جوواوده نازار وه‌ى كاره
ده‌ردم كاریه، تن بكه چاره
ئه‌گه‌ر ئه‌ى كاره له لاد ئاسانه
تیمار ده‌ردم كه ماڵم ویرانه
وه ناز و ناود من گرفتارم
خوه‌د بوو وه ته‌بیب دڵ زامدارم
بڕه‌س وه‌دادم چاره‌سه‌رم كه
له ئه‌ى په‌ژاره توزى ده‌رم كه
