چەوەڕی رادم بایده‌وه
2023-09-15T13:03:52+00:00
دڵم بیاوانیگ تەنیاس
پڕ لە وێرانیەیل واس
ئەتر شەوەرەگان یاس
چەوەڕی رادم بایده‌وه
ت دەرد بێ دەرمانمی
هەم مەڵهەمی ، هەم ژانمی
سوومای چەوەیلەگانمی
چەوەڕی رادم بایده‌وه
ساز دەسم حەیراندە
جەسەم بەن‌بەن وێرانده
دیدەم، وادەی سێرانده
چەوەڕی رادم بایده‌وه
لە هجراند بەنەیل بان
لە لیم سووز سەرتەز توان
رێوار رییەگەی کەشکەشان
چەوەڕی رادم بایده‌وه
پەپوو خوەش‌جەماڵ هاتەوە
شەیدا و سووک باڵ هاتەوە
رەنگین و پڕخاڵ هاتەوە
چەوەڕی رادم بایده‌وه
کۊەیل کیشانه تووڕ کەو
چەقی چەقاڵەی چەو لە خەو
نەرگس سۊەرمێ دایە لە چەو
چەوەڕی رادم بایده‌وه
کەیکوو چەنی نەخش ها چووێ!
شەوبوو چەنێ خوەشه بووێ!
لەو لاو چەنێ تەرکە لووێ!
چەوەڕی رادم بایده‌وه
شنەی وای شەمال هاتەوە
شوان وە شمشاڵ هاتەوە
کووچ کوردەماڵ هاتەوە
چەوەڕێ رادم بایده‌وه
سەعـیـد_عـبـادەتـیـان
