وە بی دەنگ

یە چـل ساڵە دە ئمرم چوو وە بێ‌دەنڰ

چگه ڕێ چۊ دۊەکە، ئمڕوو وە بێ‌دەنڰ

مــ° هە نووڕم وەرەو خۆارو ژەۊەر° خۆەم

نیەزانم خۆەم ک° چم ڕا کوو وە بێ دەنڰ

ئەمان هێــــــــــمان دە ســۊکەێل° درۊنم

خەنە خەن کەێ جگێ زاڕوو وە بێ‌دەنڰ

شمـــــارە کەم دە بان° یەک، شـــــەو ڕوو

گۆڕەوگۆڕ، ئەزرەت° نوو نوو وە بێ‌دەنڰ

نیەزانی خۆەت، یە چۊ ئمرت چوو ئەو سەر

دە ساڵەێلت هە کسرەو دوو وە بێ‌دەنــــــڰ

چــکۆڵ دەم دە چــەمەێلم دەێ شــەوارە

وە یەێ‌ چەک تا تلۊقِ° سوو وە بێ‌دەنڰ

خەمـو ژانــو پـــــەژارە دووگە دووسێـــت

دەمت کەم کەم دووێگە چوو وە بێ‌دەنڰ

خەنی ڕا خۆەت، دۊەتەێلە دەێن وە لاتەو

هەگ° ئۊشن وە ت° خاڵــــوو وە بێ‌دەنڰ

دە نام° ڕاس° هـــــووز° جــامــــــەکەێلە

م° هامە فێر° خۆەم هەڕوو وە بێ‌دەنڰ

منیشە جوور خۆەر° دۊم° خۆەراوا....

ڕێەو کیشم وەرەو ئاسوو وە بێ‌دەنڰ

           مەهدی ئارمانی