هه‌ناسه‌گه‌م
نازار به‌و ده‌سد بنه ناو ده‌سم
تا په‌یمان له‌نوو ئه‌ولدا بووه‌سم
من له ئیشق تن جارى سه‌رمه‌سه‌م
به‌شكه‌م ئومیدم بایگن وه‌ده‌سم
ئه‌و شه‌رت و به‌ینه هه‌ر هامه بانى
بپرس له شه‌وار وه حاڵم زانى
بپرس له ئه‌سر هه‌ردوگ چه‌وه‌یلم
بپرس له قه‌ڵه‌م ڕه‌فیق شه‌وه‌یلم
بپرس له شعرم چوین په‌ریشانم
بیس و چوار سه‌عات راد سه‌رگه‌ردانم
هه‌ناس وه‌بى تن خه‌مین و ماتم
یه‌ى دڵخوه‌شییگ به‌و بكه خه‌ڵاتم
بیلا به‌زه‌ید باى كافر دڵ له‌سه‌نگ
ئه‌را جوواوم نیه‌ید تاكه‌ى وه‌بى ده‌نگ
لیوم بارگرتگه و هه‌ناس ناچارم
ته‌مه‌ن و ڕیمه ئومیده‌وارم
له نوو دوجاره یه‌كه‌و گریمن
ئه‌سر خوه‌شیمان را یه‌ك سریمن
هه‌ناس نه‌ویشه پیم دى فایده نه‌یرى
با تازه‌وه بووگ دووسیمان قه‌یرى
نه‌ویشه پیم ئه‌وسا را نه‌تواسیده‌م
وه‌رایوه‌رموید و گشت وه‌ختى دیده‌م
نه‌ویشه پیم ئیرنگه تن خاوه‌ن ماڵید
دى ژن دیرید و باوگ مناڵید
چوین ئویشید وازبار من ماڵڕمن نیم
تن ئه‌زیزمید و خوه‌د زانید من كیم
تا رووژى مرم دووس خاسمید
هه‌م گوڵ و هه‌م دڵ هه‌م هه‌ناسمید
