هە لەلام بۊد گومد کرد‌م
لەپای سەرکەش بۊم تەمتەمەلۊلان
دۊرانۊ لە یەک زەۊ و ئاسمان
شەماڵ مەونج تەم لە کەشا جمان
لەلیم ئاوا بۊ شارەگەی گیەڵان
شەماڵ قەسەمد وەی وەڵنگ واشە
یا وەی چەویرە گ ئاوێز لە تاشە
یاگەر وە کەڵمەس یا ئەتر شەوبوو
یا وە قودووم نەرمەگیای نوو
ژاو تەمەلۊل ئێکاو ئەوکاوە
دەخیلم شەماڵ بشەن لەی ناوە
تەمەلۊل بەی دەس شەماڵەی واوە
پەنجەی مانگ نوو مەودای وەهار بۊ
سارا و سەرزەمین گوڵ و گوڵزار بۊ
دڵ لە کڵکڵەی هجران یار بۊ
تەنیا خوەشیەگەم تەماشای شار بۊ
شەماڵ قەسەمد وە دار پۊتار
پۊتار پەلوشک بێ‌وەڵنگ و بێ‌بار
یا وە لێوی ئەرجن لە زاخەیل
یا چڕی تۊڕگ هەسار باخەیل
دی شەکەت بۊمە نیەوسم وەپاوە
دەخیلم شەماڵ بشەن لەی ناوە
تەمەلۊل بەی دەس شەماڵەی واوە
ڕەفتارێ لە تار ڕەفت ئاهووە
لەژێر سەروەن زڵفێ لوولووە
باڵای ئەینەهوو نەی داڵاهووە
سفێدی پەنجەی وەفر شاهووە
شەماڵ قەسەمد وە کەپوو وەیلێ
بێماڵ بێماتووڵ بێشەوقومەیلێ
یا وەو کەوترە لە خەوف واشە
ماوا گرتێیە لەقەی ئەو تاشە
نە ڕای هامە زەۊ نە وە هەواوە
دەخیلم شەماڵ بشەن لەی ناوە
تەمەلۊل بەی دەس شەماڵەی واوە
هەنای لەڕۊ مەیل جەڵا دەی لە خوەی
دڵەم ئەو ڕۊ تاش بەرزی سەرکەش نەی
هەنای وا کەیدن پێچ زڵف لەقەی
پێچ‌پێچە چۊ پێچ ڕێیەگەی ملیەنەی
قەسەمد وە ئاو تیەنی زەینەڵخان
قەدیم تەفریگای ئێڵبەگیخانان
یا گەر وە سەردی ئاوەگەی سەرگوو
یا گەر وەبەرزی تاش کەچەڵکوو
دڵم ئەزرەتمەن پەرچ لەولاوە
دەخیلم شەماڵ بشەن لەی ناوە
تەمەلۊل بەی دەس شەماڵەی واوە
خاڵێ خوداڕەژ ها کونج لەوەێ
جفتێ زەردەبەی ها لە وەرقەوێ
سووفی سڕ مینێ لە ڕاز چەوێ
هزاران لەیلی نیەتیەی لە خەوێ
قەسەمد وە برق ئاو بان تیەتەیل
یا وە مرواری سای زڵف دۊەتەیل
ژان دەرۊنم دایم تاوتاوە
دەخیلم شەماڵ بشەن لەی ناوە
تەمەلۊل بەی دەس شەماڵەی واوە
یە فەرەوەختە لە قڵای گیەڵان
خەزاڵفرمانێگ لەناو خەزاڵان
نە لە شار لێ هەس نە کوردەماڵان
چەپاوم کردێیە داسەم وە تاڵان
شەماڵ قەسەمد وە هسارەی سوو
یا وە زەردی زەڕ هەڵقەی مانگ نوو
یا گەر وە قامەت ئەو دار پیرە
ک ڕیشەی لە جەرگ زام سەخت گیرە
سەرم گەن ئۊشێ هاڵم خەراوە
دەخیلم شەماڵ بشەن لەی ناوە
تەمەلۊل بەی دەس شەماڵەی واوە
کەڵ مانێشتە کەوک پەڕاوە
دارەگەی پیران تاف ڕێژاوە
سەوڵ یاگارە موورت سەراوە
پرزەی وارانە ترنگەی وەفراوە
شەماڵ قەسەمد وە سووەیل سوو
لە دەیشت کرێن تا پای داڵاهوو
زەهاو و دێرە وە مانێشتەوە
خانەقین وەو دەیشت خوداڕەیشتەوە
دیدەیلم چۊ جوو سەر چۊ سەراوە
دەخیلم شەماڵ بشەن لەی ناوە
تەمەلۊل بەی دەس شەماڵەی واوە
بانان
