گه‌رته چویچان
دنیا تەمه و دنیا تووز، دنیا گەرته چۊچانه
کەسێ کەسێ نیەناسێ ،گیشتێ دەم ئەڵپێچانه
نه بوو هەناس ِ عشقه ، نه رووژنای راسی
دنیا خراو ، دنیا گەن ، دنیا دروو دەسانه
زەمین زەرد و زەمان زەرد ، ئاساره و ئاسمان زەرد
کوتێ داخیم کوتێ دەرد ، ده ئێ زەردەلۊلانه
تەو ئەڵکزان سقانم ، لەرز ئەڵچه قان دنانم
گیانم بۊه پەتەسوو ، دەێ ئاگر گڕانه
شڵەێ شەڕەو و گڕەێ نار ، گرمەێ گورگه و هافەێ مار
یە کەێ بەخته ؟ بێداده ، یه کەێ تاڵەس؟ تاڵانه
هەم زەردەواێ په ژارەس ، هەم سه رده واێ پەشێوی
روو دەێ زەرده زەمانه، وەێ دەێ سەرده ساڵانه
ئاگر ها ده دەرۊنم ، زەهراو ها نام ِ خۊنم
ئووخەێم پڕ ده ئاخه ، ژیانم پڕ ده ژانه
زەمین زەخم و زەمین زار ، زەمین ژەهر و زەمین ژار
زەمین پەلامێ بڕێا ، زەمین بێ ئاسمانه
باڵ فرێشته رزیا ، باخ بهەێشت ئەڵکزیا
دووزەخ هفاو دا دنیا ، ئێ ئژدهاێ خوڕانه
ئێ بار پڕ ئەنیشه ، ئاخر ئەڕا چه کیشیم
ئێ هەمگه عەزاوه، ئاخر ئەڕا چه مانه ؟
وڵ که خیاڵ هاتگ ، بڕواکن ئێ هەناسه
وڵ که پەژارەێ ناتگ ، مەس بوو ده ئێ ئەلانه
تووز تیەڵه و تەم ره ش ، کول کەفتنه کەش ئەڵ کەش
کەس دەر نیەچوو وە بێ به ش ، مه ردم ! ده ئێ قڕانه
دارەێل ئەڕاچه هشکن ،گوڵەێل ئەڕا نیەوشکن
قەناریەێل ِ دڵ تەڕ ، بێ دەنگ ئەڕا وسانه
ئه ورەێلمان مەزووکن ، تافەێلمان مەرێژن
نه تافەتاف ِ رێژاو ، نه نم نم ِ وارانه
نه رووسەمێ دیاره نەیشه ئسفەندِیارێ
نه شوون ِ قارەمانه ، نه نوون ِ پاڵەوانه
نه دین ماگه نه ئێمان، ساهڵ رەم کەێ ده سا مان
هووش و گووش و پووسمان ، پڕ ده شەڕ و شەێتانه
زەمانه پاوەمانگه ، ئەوجار ئەڵامه ت ئاورد
ئێجار بزانیم چه زاێ ، ئێ ژن ِ زاوه رانه
شکیا دڵ و پێشتمان ، کردنه ئاڵێشتمان
گم بۊمنه گێشتمان ، ده ئێ چوارده رێانه
نه چه‌فتیمن نه راسیم ، نه گه نیمن نه خاسیم
بڕێ خوەمان مەناسیم ، مایمه دەێ نام مەرزانه
زوانمان شێویا ، بۊه وهفر و تێویا
تێوێگوه جوور وەفر ، هەر کەس ک بێ زوانه
پەلام ئەو کی بوەیمن ، دەێ زەرد ِ بێ زەواڵه
هاوار ئەو کوو بکیشیم ، دەێ هۊچ بێ هچانه
بڕێ گورگن – دنان هار- ، دەێ جەنگەڵ جنوونه
بڕێ وەرکەن- وەرەولا -، ددێ دەێشت ِ بێ شوانه
بارێ ها بان ِ کووڵم ، چنه ککۊێ بانکووڵه
ققیەێ ها قوڕن ِ دڵم ، چنه قڵاقیڕانه
خوەزەو رها بۊاتایم ، رووژێ وه کام و حەزرەت
ده ئێ زرپ و زوورانه، ده ئێ گورز و گووچانه
خوەزەو واران بوارێ ، دەێ هەڵەتِ هەڵاکە
خوەزەو شه‌فه‌ق بوشکێ ، دەێ شەو ِ بێ بەیانە
قسیەم راسه شەکەتە ، خوەزەو نناەێ ئمێده
شێعرم راسه لەت لەتە ، بەزەی نناەێ ژیانه
*زاهر سارایی
