ئەنفال
هەناسەیل بی سینە
لەوەر ئی ژیان سەردە
چینە پووس زەوی
لایە لایە ئەڕا شوین پای مناڵە شەکەتەیل کەن
جوی چەن کەسیگ لە هەڵپەرکە
پەنجەیل شکیاگ لەەشان یەک
وەڕزارەو وسیانە
دیرن شانەی سەر توخمارەی ئاوایەیل فەوت هاتگ خوەیان کەن
لە هویر نەوەن
سەرچووپیەگە هاوە دەس کولکوانە نوقرەی داپیرمان
لەناو بوخچەی گریە دریاگ
لەهویر نەوەن
نەوا بزڕنگیەێد
وماچەیل دوێەکەینیمان
داچەڵەکیەنەو
لەی ناوە من مینەی زووانیگ کەم خوەڵ نەخواردوێدەی
تا قسەیل نەکریاگ بویشم
تا دەنگ زوڕنای ئی چاڵەیلە
جوی گوڵ ووڵاوە بکەم
چەوەیلیگ خوازم
پەڕو سفت بانیان نەپوشاوێد
تا ئەسریگ وەگورەی ئی ئەسر خوینینە بڕشنم
باڵ نەرمیگ لەناو ئی کوێەیلە گەردم
تا سەر کوورپەیل بی گوناه وەبانی بنەم
مینەی بڵویزەی گیانیگ کەم
لەی خوەڵەکوە
تا وەپی هەرچەگ مردی هەزار ساڵەی ئی خاکە زنیەو بکەم
کی لە زنی وەچاڵ زنی ترە؟
ئی ئاسمان پڕ لە بوغز
چوی بنەمم لە یاقەت و بارمەدەو خوار
وچوار مشقی بنیشید
و مەتەڵ ئەو داگیر کردنەگ وەچەو دیدە باس بکەید
ئەی چاڵەیل پڕ شیوە شیوە
بویشنە ئی شیوەیل پڕ چاڵ چاڵە
دی چە لەی تیوڵەیلە نویسیاوێد
وفریشتەیل نەزانستن خاس لەلی بخوەننەو
وتەنیا شەهیدەیل لەلی ڕەسینەو
دی کام بەڕ
لەسویک ووڵاتمان مەنیە
ئاویاری وەخوینمان نەکریاگە
دی کام پەڕەی قورئان مەنیە
وەپی بوکوشنەمان؟.
شعر/ کەنعان حاتەم موڕاد
