ئنسان 1

ئنسان 1
2021-01-08T19:14:35+00:00

من تەک واژەی سەر لاپەڕه  نیم 

 ک تام گوڵێ کاقەزین بگرم 

خەڵاتێ ڤڵاتێ بێ ڤڵاتم 

ئەر هەقم  یە بوو  یێ  واژه بنۊسم 

 ئنسانه مەنۊسم 

ئەر مەێتین قۊته بەین

 دەریا هەس

 هەر چێ مووشین بووش 

هەر ڤەخت هێزه مەگرین، هەر هێز گر 

ڤتنت یا  ک  هێز گرتنت 

مەڕمنێ بارگای  دووزەخ و بەهشت  فرووشەل 

ژین فرووشی نیه 

ئەۆ   ک  ڤتێ 

 بییه ڤێنەی ژین 

ئەۊ ک هێز گرت بییه ڤێنەی زەمان 

ئەژ  ئەقربەی سات بپرس! 

 ک    ها  ڤیرێ 

کەس و کارم ئاشق ژیان 

 ئەر منە  مەژیم 

 ئەر تونە مەژین 

دەنگ ئشق ها ڤیرمان 

منە  مەنۊسم  ئنسان 

هایتێر تو بووشین ئشق 

 هایتریش بێ مەرگی

 *

ئنسان 2

شەوێ ک خۊن مانگ

رووژێ ک خۊن هوێر، ماوە  جەوهەر خودنڤیسم

نامەی ئەڕا دەر و دەرڤەچ ماڵ و ئاسارەل خاکە مەنۊسم

پەڵنگ سێنەم ڤازە مەورێ  ئەڕای مانگ

کەمووتەر شێعرم مەنیشێیە سەر یاڵ خەیاڵ

شەوێ  ک  دار داخە مەکیشێ

شێعر ماوە پرسیار

مەنسوور مەپایە  دار

داریش مەپایە مەنسوور

هەسیر مەپایە ئەینولقوزات

ئەینولقوزاتیش مەپایە هەسیر

بەقداد مەپایە هەڵەب

هەڵەب مەپایە بەقداد

ئنسان مەپایە ئنسان . . .

تاتە شەماڵ (قاسم ئەرژەنگ)

Shafaq Live
Shafaq Live