ناخاڵه بويم..!
ئه‌و جاره‌گه وتم:
يانه هاومه‌زه‌ون و شايد حورمه‌ت ده‌نگه‌گه‌م بگرن
وه‌لی نه ، گشتی خه‌ياڵ بوی و هويچ ئه‌ڕام نه‌كردن
ماڵه‌يل خوه‌يان ئاوه‌دانه‌وكردن و منيش ئه‌وه‌سه هه‌ر هامه كه‌لاوه‌گان ئه‌بو سێفێن و سه‌دريه‌و ده‌هانه و قوشه‌ل و نزيكه كه‌لاوه‌گه بڕميه‌يگه ملما
نه‌خه‌ير هاوزوانم ! دی قه‌د پشت وه‌بيگانه نيه‌وه‌سم
بيگانه هه‌رچی بووگ هه‌ربيگانه‌سه‌و ، كه‌سوكارم وهاوزوانه‌گه‌م هه‌رچی بووگ كه‌می سوزهاله دڵی .
براگه‌م ؛ قه‌ومه‌گه‌م ؛ كه‌سوكارم وهاوزوانه‌گه‌م ! ئه‌گه‌ر گوشتم بخوه‌ی سوقانم نيه‌شكنی
نه‌خه‌ير، ئيجاره ده‌نگم نيه‌مه ئه‌وانه‌گ ته‌نيا وه‌زوان دڵخوه‌شيم ده‌ن و وه‌ختی بويشم كوردم ؛ خنجه‌ره‌گه‌یان ده‌ركه‌ن و ئه‌گه‌ر ئه‌رايان بكريه‌ی زوانم له بنا بڕن
نه‌خه‌ير ، ئيجاره ده‌نگم نيه‌مه ماره‌يل خوه‌ش خه‌ت وخاڵ
ده‌نگم ده‌مه كورد! ده‌نگم دمه كوردستانه خويناويه‌گه‌م
ده‌نگم نيه‌مه ئه‌وانه‌گ ك هه‌روه‌ختی ناو كوردستانی بوين كه‌ركوك و خانه‌قين و به‌دره‌و زرواتيه‌و مه‌نه‌لی بارم ؛ يه‌كه‌وگرن و دگانه‌يليان تيژ تيژ كه‌ن و توان زگم بدڕن
به‌ڵێ !! ئيجاره ده‌نگ خوه‌م ده‌مه موره‌شه‌حه‌يل كوردفه‌يلی ؛ ده‌نگم ده‌مه ڕووڵه ئازاگان خانه‌قين ومه‌نه‌لی ! ده‌نگم ده‌مه هاوزوانه‌يل ئه‌زيز به‌دره‌و جه‌سانی و زرواتيه‌و كوتاوی ؛ ده‌نگ ده‌مه ئه‌وه‌گ پڕ وه‌ده‌م هاواركه‌يگ ، بژی ئازادی !!! به‌رقه‌رار بمينی ديموكراتی و فدراڵی ؛ ئاوه‌دان بووگ نيشتمان! بژيه‌يگ كورد و كوردستان .
