مەچوو
ئه‌ێ سه‌وڵ ِ سه‌وز لێو کیه‌نی
رێک و ڕه‌نگین چۆ گوڵوه‌نی
مه‌هشه‌ر ده‌می وه‌ختێ خه‌نی
ده‌سِم وه داوانِد مه‌چوو
ئه‌ی په‌ڕ ِ قوو، ئه‌ی باڵ ِ به‌ت
که‌وک ِ نسار ، ئاهوو هه‌ڵه‌ت
قاروون ِ هۆسن و خاڵ و خه‌ت
ده‌سِم وه داوانِد مه‌چوو
ئەی ئاونگ ِ قه‌ی وه‌ڵنگه وه‌ن
سه‌ر سه‌وز ِ ناز ِ ناو چه‌مه‌ن
له دوورییِد تاقه‌ت نه‌مه‌ن
ده‌سِم وه داوانِد مه‌چوو
چۆزه‌ی چه‌ویر ِ بوو خوه‌شم
پرچ ِ به‌ڕه‌زاێ سه‌رکه‌شم
ئه‌ی نه‌ونه‌مامِ مه‌هوه‌شم
ده‌سِم وه داوانِد مه‌چوو
ئه‌ی شووخ ِ شێوه نازه‌نین
لیکه جووان ، قامه‌ت ره‌نگین
سه‌خته له باڵاد دڵ که‌نین
ده‌سِم وه داوانِد مه‌چوو
ئه‌ی دڵخوه‌شی رووژ و شه‌وم
ئارام که‌رەی له‌رز و ته‌وم
که‌ی ناز ِ ده‌نگێ لید ئه‌ژنه‌وم
ده‌سِم وه داوانِد مه‌چوو
ئه‌ی ناز و توور له قایە ڕه‌ێ
خاوه‌ن خه‌زانه‌ێ زه‌رده به‌ێ
وریاوه پایز ها له په‌ێ
ده‌سم وه داواند مه‌چوو
هام له په‌ژاره رووژ و شه‌و
ناڵم له وه‌شت ِ له‌رز و ته‌و
ئه‌ر گیان تووای نه‌م له گه‌ره‌و
ده‌سم وه داواند مه‌چوو
ئه‌ی باخه‌وان ِ باخ ِ به‌ێ
شیرین تره‌ک له شه‌هد ِ نه‌ێ
لیموو له مل مێخه‌ک له قه‌ێ
ده‌سم وه داواند مه‌چوو
به‌س که، شه‌مامه‌ێ خوه‌ش بووِم
کووره‌و مه‌که هام و شووِم
مه‌ر نیه‌ژنه‌وی هه‌ێمه‌ڕووم
ده‌سم وه داواند مه‌چوو
چاو کاڵ و هۆل ئه‌بروو که‌وان
گوونا گوڵی چوو ئه‌رغه‌وان
مه‌ێ خوه‌ش ئه‌نار شاره‌وان
ده‌سم وه داواند مه‌چوو
نووڕِد نیه‌که‌م دۆنیا وو دین
پام ها ڕکاو ئه‌سپ و زین
هه‌ر جاێ بچی هام له که‌مین
ده‌سم وه داواند مه‌چوو
دانیش له لام هه یه‌ێ گڕێ
یه (سابر)ه ئه‌و تو چڕێ
واکه چه‌ود بووم وه خڕێ
ده‌سم وه داواند مه‌چوو
مه‌یله‌م وه جی سه‌رسان ِ ئێڵ
ئه‌ر به‌یده‌مه تاوان ِ ئێڵ
ئاهـــم گرێ داوان ِ ئێڵ
ده‌سِم وه داوانِد مه‌چوو
* ئوستاد پەروێز بەنەفشی
