مەشکە
دە وێژەێ دەمەکی یا ئەدەبیات شەفاهی، دە ناو کارەیلێ جۊر، قالیکردن، گەلەدرەو، دەسکەنە، شوانی، مەشکەژەنین و... ئاوازەیلێ خوەنریەن ک دە فارسی پێیان ئۊشن "کارآوا" یا "آواز کار"،
ئێ ئاوازەیلە، لە بووت بنجوورییەیل زوانناسانە فرە گرنگن و لە چوارچوو "زوانناسی جەستەیی" ( "Corpus Linguistics") تیەنە ئەژمار.
"بەێت مەشکە" یەکێگ ژە ئێ "کارئاواز"ەیلەسە ک لە وەخت مەشکەژەنین وەکار چوو.
لە خوار، چەن نموونە "بەێت مەشکە" تیەریمن ک ژنەیل ناوچەیل جووراوجوور دە ئوستان کرماشان وەگەرد خوەێان لوورنن و خوەننەێان.
مەشکە بژەنیە لە کەف و کەرە
ئاو ئەڕاد بارم لە جوو سەیمەرە
مەشکە بژەنیە لە کەرەێ پەتی
ئاو ئەڕاد بارم لە جوو شەروەتی
مەشکە بژەنیە لە کەرەێ کەم‌دوو
ئاو ئەڕاد بارم لە ژێر سەرگوو
مشکە بژەنیە لە کەرەێ چڵچڵ
ئاو ئەڕاد بارم لە کیەنی بڵبڵ/دڵدڵ
مەشکە بژەنیە زەڕ لە باند بوو
ئووردی براگەم شەو میەواند بوو
مەشکە بژەنیە تا بەرد بۊنم
جەلاو هاتێیە شەۊ پید بسینم
مەشکە بژەنیه نۊرواراند کەم
ئووردی براگەم شەو میەواند کەم
د. پالیزبان هەنین
