له‌ياد هێمن موكريانی شاعر
له‌شوون شعر كلاسيكی خاوه‌ن شيوازيگ شعر و نويسانن خوه‌يه و شعره‌يلی چ له‌لايه‌ن شيواز و چ له‌ناوه‌ڕوكه‌وه له‌و نه‌وه سيمايگ تايبه‌ت وه‌خوه‌ی ديريگ ، وه‌لی وه‌ل ئه‌وه‌يشا هێمن كه‌فيگه ناو نه‌وه‌ی شعر تازه‌ی كوردی و شعر كلاسيكی كوردی و له هه‌ردوگ شيواز نويسانن خاوه‌ن بنه‌ڕه‌ت تايبه‌تيگه وه‌خوه‌ی . له‌شعره‌يلی ك شيوه‌يگ كلاسيكی تازه وه‌پيانه‌وه دياره له‌شيوازه‌يل كيش يا وه‌زن عه‌ره‌بی لاده‌يگ و شيواز (كيش په‌نجه‌يی) تيه‌ريگه كار له شيوه‌ی بڕگه بڕگه‌كردن وشه‌وه .
وه‌لی ئه‌گه‌ر بايگ ته‌ماشا بكه‌يم دوينيم له‌ڕوی ناوه‌ڕوكيشه‌وه ، شعره‌يلی فره له‌هس نه‌ته‌وايه‌تی و سياسيه‌وه نقوم بوون فره چنه قاڵب نه‌ته‌وايه‌تی وه‌بی ئه‌وه‌ك جوانيه‌يل سروشت و ئافره‌ت يا ژن له‌لای گوم بوون . ئمجا له‌ی باوه‌ت و ناوه‌ڕوكه ، زوان شعريی هێمن ره‌وانی فره كاريگه‌ر وجوانيگ گريگه خوه‌ی و شيوازه‌يل تازه‌ی ته‌كنيك شعر تيه‌ريگه كار، وه‌تايبه‌ت له‌ڕوی ره‌وانيه‌وه ك هێمن له‌ی باوه‌ته‌وه شعره‌يلی پڕن له‌ڕه‌گه‌زه‌يل شعر ره‌وان ، جوير ئه‌وه‌ك چوين له‌شعر هێمن هه‌ناسه‌يگ خه‌مين و قويل رۆمانسی خه‌يگه كار ك له‌تی هس وه ئه‌وه كه‌يد وه‌ل سووزه‌يليا كاريگه‌ر بويده‌و هه‌مان وه‌خت وه‌ليا ئه‌و هسه‌يله وه‌ره‌و خوه‌شه‌ويسی و ناديار به‌نه‌د ، وه‌تايبه‌ت له‌و شعره‌يله ك له‌كتاو شعر (ناڵه‌ی جودايی) ك له‌تی شاعر باوه‌ته‌يل ئه‌زموون شعری خوه‌ی نويساگه و گشت ئه‌وانه‌ك خوه‌ننه‌ی وه‌جاريگ كاريگه‌ر بوون وه‌پی .
بيگومان يه‌يش چووگه‌وه ئه‌را ئه‌زموون ده‌وڵه‌مه‌ن ژيان شاعر هيمن موكريانی ك له‌و رووژگار وه‌زع ناله‌بار كوردستانه‌و له‌و سه‌رده‌م تون وتيژه ك ملله‌ت كورد له‌تی ژياگه گه‌وراترين كاريگه‌ری له‌بانی داشتگه‌و زياتر وه‌ره‌و گرفت و ده‌رده‌سه‌ری وكيشمه‌كيشه‌يل سياسی به‌نه‌ی ك كورد له‌تيان نه‌ته‌وه‌يگ له‌ليقه‌ومياگ و بيبه‌ش بويه له‌گشت هه‌قيگ سياسی و رووشنهويری و تاريخی و له‌گشت ئه‌يانه دويره‌و خرياگه‌و بيجگه ئه‌وه‌يش له‌ناونی وڵات و ناوچه‌يی و جه‌هانيه‌يله‌وه زوڵم له‌لی كريه‌يگ و ئی وه‌زعيشه كاريگه‌ری فره‌يگ داشتگه له‌بان هێمن و له‌يوا له‌لی كردگه روی وه‌ر يا مه‌ساحه‌ی گه‌ورايگ له‌شعره‌يلی ئه‌را ئه‌و كيشه‌و گرفته‌يله بردگه‌و تا له‌يوا له‌لی بايگ جوانترين شعره‌يلی ئه‌را نه‌ته‌وه‌و نيشتمانه‌گه‌ی بنويسيگ . هێمن موكريانی شاعر له‌ڕوی ئه‌ده‌بيه‌وه خاوه‌ن ئه‌زموونيگ شعريی خوه‌يه ك باڵ كيشاسه بان دو سه‌رده‌م شعری كوردی و ئبداع له‌تی كردگه . هه‌زاران سڵام له‌گيان پاك شاعر پايه‌به‌رز كورد هيمن موكريانی و گشت ناوداره‌يل كورد و كوردستان .
