قه‌سه‌م

وه‌‌ قورسى تاق هه‌‌فت لوو ئاسمان

وه‌‌ قورسى زه‌‌وى و وه‌‌ دویرى زه‌‌مان

قه‌سه‌م وه‌‌ قورسى ئه‌‌جرام گه‌‌ردان

قه‌سه‌م وه‌‌ پاكى سینه‌ێ ئاسمان

قه‌سه‌م وه‌‌ گه‌‌ورای هه‌‌ر ئایه‌‌ێ قورئان

وه‌‌ ئاێه‌‌م قه‌سه‌م وه‌‌ په‌‌ێغه‌‌مبه‌‌ران

له‌‌ ڕووژ مردن تا وه‌‌ پێا بوین

قه‌سه‌م وه‌‌ ساز ژیان و وه‌‌ خوین

وه‌‌ لاوه‌‌ لاوه‌‌ێ لاوه‌‌ێ داڵگه‌‌یل

وه‌‌ ئشق پاك مه‌‌جنوون ئڕه‌‌ێ له‌یل

به‌‌ینه‌م له‌‌ ئاگر وێنه‌‌ێ سیاوش

بكیشین گیانم ئه‌‌گه‌‌ر له‌ ماوش

وه‌‌ سیخ ئاگر سو‌رمه‌ێ چه‌‌وانم

بكیشین بووڕین تێژی زووانم

سرفت كوڵیاێ له‌‌ گووشم بكه‌‌ین

مه‌‌خزم درارین په‌‌ێ گره‌‌و بوه‌‌ین

جه‌‌رگم هه‌‌ڵكه‌‌نین درارین له‌‌ بیخ

له‌‌ت له‌‌تێ بكه‌‌ین بكیشین له‌‌ سیخ

ره‌‌زم سقانم به‌‌ن به‌‌ن جیا كه‌‌ین

یه‌ك یه‌ك بشكنین له‌‌ ئاگر بخه‌‌ین

دڵم ده‌‌ر بارین بشكنینه‌‌ێ ژار

كه‌‌ینه‌‌ێ‌«خوراك مه‌‌ل و موور و مار»

له‌‌و خوم مه‌‌یه‌‌ هه‌‌ر مه‌‌لى بخوه‌‌ێد

مه‌‌س بوو وه‌‌ كوردی زووان پێ وا كه‌‌ێد

یه‌‌ێ قه‌‌تره‌‌ له‌‌لێ له‌‌ زه‌‌وى بڕشیه‌‌ێد

نه‌‌خشه‌‌ێ كوردسان وه‌‌ نه‌‌خش زه‌‌وى كه‌‌ێد

به‌‌ێداخ كاوه‌‌ قه‌سه‌م وه‌‌ باڵاد

ئفتخارم به‌‌س، ژیانم له‌‌ پاد