خڵاتد   ئەێ     قلاجەێ      پیرِ    کەڵهڕ 

کوڵەنجەێ  مەخمەڵە ، ئەقراجەگەێ  دڕ

کڵاو   وەفرینەگەد   دیمە      ‌سەرِ سوو

تریفەێ  شەونمێ  دەێدن  وە  شەوبوو 

لە کەرتِ  داوەند    مانگ  ، نوقرە   ناێە 

هەتاوی   وەو   زەڕە   هجڵەد    بەساێە 

چکەێ سورخاوەگەێ لالەیلِ    نووڕەس  

پیاڵەێ    بادەسە   ڕا   شارِ   سەر مەس

کوڵەنجە  سەونزەگەد  مێوان  گلەو دەر

چراێ  گۊجەیلدی  جامە‌ک‌  لە ڕێ‌  خەر

زەڵەیلِ    مووسقی    خرمەێ      شکارد 

بریقەێ       قەێ‌‌ قتارِ       کووڵە    وارد 

شرینانِ پاێ سەنگاود دەس ،  وە  جامِن

بە‌شانەێ     جامێان    نوقرەیلِ    خامِن 

بەریو   سوومارە‌می   ها    خوانِ   وازد 

لە سینەێ     خەفتێە     ڕێزەیلِ     رازد 

تنی   جیگاێ    شوانِ  دڵ‌تەنگِ     وەیل      

ڕێان  گوم کەردەگەێ  سەر‌مەنزڵِ   لەیل 

نەوەیدە     هۊردی    سروەێ    شەماڵد

وە  چۊزە   منجقان  نەێدن    لە    شاڵد

کزِ    کەێکوو   تِنم  ،   وەو     بارِ   لێوە

بەرێ    نەێرێدن‌ و     زەڵفێ    پەشێوە     

خەزاڵد وەو   چەوەیلِ    سورمە   ساێە

دڵان  گش   بردێەو   یەێ    دڵ    نێاێە 

سوار و   پاپێا     تا     بوونە      مێوان  

گوڵاڵە ، سەر‌چەمان     ها   خزمە‌ تێێان 

شە ماڵان  ڕەخسنێ  شاخەیلِ ئەرجەن 

شەکێدن وەو شنە   چووپی‌دەسِ وەن 

ئێران   عەلیکەرە‌می