فرووشیامە
فرووشیامە
وەشەو خەفتم لەماڵ خوەم بۊم
م خاوەن دووس و هاودەم بۊم
هەنای رووژ هات، لە خەو هەڵسیام
چەوم واز بوی، وپا وسیام
چەویگ گڕ دام...
یە کوورەس؟ یە کییە؟ و کامە؟
تمەز مەردم هە نیمەی شەو فرووشیامە
فرووشیامە
نە خوەم تەنیا
من و پووشەن وەگەرد سەرنیا
خەو و راسی و گشت دونیا
کەلاوە و کۊز و قاجاخم
سێ کوچکە و ئاگر داخم
کڕ نۊسیاگ یادەیلم
لەقەی دیوار و دارەیلم
نزۊرەی بیسەوادەیلم
فرووشیانە
یەکیگ لۊلەی تفەنگ ناسەو وەقەی پشتم
خودا پووڕێد لەناو خەو یەی کەسیگ کوشتم؟
چە دیرێ توو؟
دەسم واز کەم
لە کڕ ناو قپاڵ زیاتر نییە مشتم
چە من دیرم؟
چە من دیرم؟
دڵنگ خۊنین باپیرم
لە سۊک میلکان بی خشتم
هەڵس، دانیش
دەسد هەڵگر، قولد داکیش
بچوو، بەورەو
درار چشتەیل گیرفاند
یە کی بۊ من فرووشت و کی بسینم بۊ؟
خەنینەی بیوەی دۊکەم وە شینم بۊ
وە چاینە وموور
و دیدەی کوور
چە من دیرم؟
چە من نەیرم؟
دەسڕ دەس داڵگم بۊ ک ئی خاکە ئەوەیجۊرە هەڕیایە
وە شەن دەس باوگم ئی خەرمان ئەسارەیلە لەئەو ئاسمانە چۊچیایە
وە کووڵ چەمیای برایەیلم سەنگ ئی کۊەی بەرزە چنیایە
وە تک نۊخان خوەشکەیلم ری وبانەیل کڕیایە
وە ئەسر چەو لە دووسەیلم چەم ئەڵوەن وەئێ چواردەورە رشیایە
ئەڕا بانان رووڵەیلم وە نرخ کەی فرووشیایە؟
ئەڕا دیوار مناڵەیلم لەئی تاوسانە بی سایە؟
چە دیرێ توو؟
چە من نەیرم؟
قسەی کوونەیل باوانم
ووشەیلیان خستمە داوانم
وتم تا خاوەن زوانم
فرەیگ دیرم
وتم تا خاوەن زوانم
وەپی باس کەم ئەوەگ زانم
فرەیگ دیرم
وەپی ئۊشم، وەپی گیرم
م تا ئی زوانە ها هۊرم
فرەیگ دیرم.
کەنعان موڕاد/ خانەقین
