شەکەت لە بێکەسی
شەکەت لە بێکەسی، لە یەێ ڕەنگی یا لە وسان خوەد
شەکەت لە پاێ کە نەیریدن، خجاڵەت لە گووچان خوەد
شەکەت لە جاڕەگان و کوتر دڕیاێ و قڵاگاند
شەوێ دادە سەرد ئەودەیشت بیەیدن دی لە گیان خوەد
ت هاتی بۊدە ئاێەم تا جواو باوەشـــەیل بێ
لەشد بەن، لە خوەدەو هاتی ک گیان بەی وە ژیان خوەد
وەلێ ئێرە لە ئاوات ڕەنگین قەڵبد پڕەو کەن، بەع
دەسد نیشــان ڕاند دەن بێەی لە بان ڕان خوەد
ئەوەڵ قەڵبد دڕن ئێکە گتەو دەن تا بمینیدن
تن و شوون گتێگ و یەێ نەمەکدان زامەگان خوەد
وە پێد ئۊشن کەمووتەر؛ ئێکە باڵەیلد بەسن، وەختێ
ک نووڕیدن بەدت تێدن لە خوەد لە ئاسمان خوەد
لە ئێرە هەر کە شەو یەێ ڕەنگ، بەیان یەێ ڕەنگ ترەک دێرێ
عەزاود دەێ نەنووڕە یەێڕەنگی قەڵب و زوان خوەد
لەشد بوودە کەمان چەمیەێدن و گیاند هە چۊ تیرێ
خوەشد تێدن شەوێگا دەر بچوودن لە کەمان خوەد
وەتی بێکەس هەرەو تەنیاس؛ وەلێ خوو بێکەسی یانێ
هزاران کەس لە دەورد بوو، بنیشی خوەد لە شان خوەد
خوەش هاتیدە وە دنیاێ ئاێەمەیل ئەێ داوڵ سەرشێت!
وەلی چەن ڕووژ تر بۊدن پەشێمــان لە ئەلان خوەد
شەکەت لە بێکەسی، لە چەن‌ڕەنگی، لووبڕ لە ئاێەم بۊن
لە ڕانەیل کەوەو بۊ، لە دەنگ خرچەێ سقان خوەد
لە نوو چی باوەشد وا کەی وە کوتر شــــووڕ دڕیاێگ
لە نوو چیدن بکیشیدن خجاڵەت لە گووچان خوەد
ماجوو مێهری
