رودوس فەیلی

دڵخوەشم؛ دەێ غەزەڵە؛ وەزم تو بیشم؛ بەسمە

زاوەران عشقێگم ژانێ ک کیشم؛ بەسمە

تا بنم سەر دە سەرینەت خپ بکەم دەو باوشە

سەر سەر سینەت بنم، ساتێ بنیشم؛ بەسمە

مەس بـِـوِم، هەم مڕ بِــوِم، هەم وەو هشارەێ چەمەوە

خوەم لە دۊرەو جام‌جامێ سەر بکیشم؛ بەسمە

دەم دە نام ِ دەم، خێیاڵێ خامە؛ جگ‌جگ کوشێگەم

لەو سەر پرچە هناسێ ئەڵبکیشم؛ بەسمە

دڵ تەماکار ِ  مناکارە؛ نیەهیلێگەم؛ وە نە

سەر ِ تەرمم هەڵهەڵەێ شووڕێ بکیشم؛ بەسمە

چەنە قەی‌باڵاێ شرین تو دە بان ِ سان ِ قەور

تاشەبەردێ، بەردەشێرێ تر بتیشم؛ بەسمە

وەختێ شەوگاریش ئەڵەم ئەڵگەردنێ زۆڵفە رەشەت

هەر بشێوێگ و بشێوێ بەخت و تۊشم؛ بەسمە

رودوس فەیلی