ئەگەر بۊشم چەنێ هاڵم خڕاوە

ئەگەر بۊشم چەنێ هاڵم خڕاوە، باوەڕد تێ؟

تەمام زندگیم رەنجو ئەزاوە... باوەڕد تێ؟

ئەگەر بۊشم ک ماڵ بەرز و گەوراێ ئومیدم

دۊاێ چێند بیە جوور کەلاوە... باوەڕد تێ؟

چەنێ سەختە ک بێ ت جوور ئەوسا زندگی کرد

چەوم چۊ ئەور زمسان پڕ لە ئەزاوە... باوەڕد تێ؟

لە وەختێگەو ک چییدە، تاقەتم نیەگرێ ئەزیزم!

لە دەر ماڵد هێمانێ هامە پاوە... باوەڕد تێ؟

مەگەر ئاێەم چەنێ تابو تەوان دێرێ؟ ت خوەد بۊش

مەڕەنجەیلم وە ئەندازەێ پەڕاوە... باوەڕد تێ؟

ئەوێ ک یەێ دەفە ئاشق بیە زانێ چە ئۊشم

ت چۊ وەێ زامو ژان بێ هساوە... باورد تێ

توام یەێ ڕووژ بنۊسم هەرچێ ها سینەم وە داخەو

ئەگەر بۊشم چەنە پەنج شەش کتاوە... باوەڕد تێ؟

ت خۆەش بوو هایدە هەر کوورە، وەلێ خۆەزێا بزانم

یە ک ئۊشم فرە هاڵم خڕاوە... باوەڕد تێ؟؟؟!

شاعێر: ڕزا _جەمشیدی