دڵم گریاس
وه ئى هه‌مكه‌ى خه‌م و داخ و په‌ژاره
وه ئى هه‌مكه‌ى ئه‌زاو بى شماره
چه دونیاى بویچگ و ته‌نگ و گه‌نیگه
چه ده‌وره‌ى ئایه‌مه‌یل سه‌د ڕه‌نگیگه
چه دونیایگه پڕى ئاگر پڕى ژان
پڕى له ئه‌زره‌ته‌یل كاڵ بى گیان
پڕى له خوه‌زیه‌وه‌یل بویچگ و سه‌رد
پڕى تامازرووه‌یل قرمز و زه‌رد
چه دونیایگه بڕیگ ورسى بڕیگ سیر
بڕیگ خاسن بڕیگ دڵگیر دڵگیر
بڕیگ هه‌ر وه مناڵى داخ دوینن
بڕیگ هه‌ر وه مناڵى كاخ سینن
چه دونیایگه ته‌قه‌ى تیر و تفه‌نگ تى
ده‌نگ نویزه‌ى كه‌ل و قیڕه‌ى په‌ڵه‌نگ تى
ده‌نگ پووقه‌ى گوله‌یل پڕ له قینه
ده‌نگ شینه وه جى جى ئى زه‌مینه
چمان بوو گاز چه‌و كووركه‌ر تیه‌یدن
چمانى هه‌ر مناڵه‌و تاسیه‌یدن
چه دونیایگه پڕى قه‌یران قه‌یران
چه دونیایگه بیه‌سه ویران ویران
چه دونیایگه پڕى شار هه‌ڵه‌بچه‌س
وه جاى ئازادى ده‌س گشتى كه‌له‌بچه‌س
چه دونیایگه هیرۆشیما دیه چه‌و
چه دونیایگه كه وجدانه‌یلى ها خه‌و
دڵم گیریاس وه ئه‌سر ها ناو چه‌وه‌یلم
شه‌وه‌یل مرده‌زمایگ ها ناو خه‌وه‌یلم
دو ته‌ور تیژ و قه‌وى ها بان شانى
توایدن داره‌گان بووڕى چمانى
تویه‌نیمن ڕاهه‌ت و بى خه‌م بنیشیم
زه‌مینیگ سه‌وز سه‌وز سه‌وز بكیشیم
تویه‌نیمن ئاو بكه‌یمه‌و پاى خوه‌شیمان
تویه‌نیم ئاگر بنه‌یمنه‌و بى كه‌سیمان
تویه‌نیم هه‌رچى خوسه‌یله پا وڵا كه‌یم
تویه‌نیمن ده‌روه‌چه‌یل تازه وا كه‌یم
به‌ره‌فتاوه‌یل وه‌ره‌و خاسى بكاریم
تویه‌نیم ڕیشه‌ى په‌ژاره‌یلیش دراریم
--
چه دونیایگه چه‌نى ئه‌زره‌ت دیریمن
چه‌نى وه تاى دڵه‌و هه‌ر نیه‌خه‌نیمن
چه دونیایگه چه دونیاى سه‌د ڕه‌نگیگه
چه دونیایگه چه دونیاى دڵته‌نگیگه
