دوو پارچە شیعر

پەنشەمه لە نوو دڵم تەزانەو

جەرگ سزیاگم لە نوو سزانەو

چەپاڵێ لە خەم وە بەش دا وە پێم

 خێاڵم سافۊ، هەڵگەردانەێ لێم

داوەشکان لە یەک، ئارامی هۊرم

ئەوسا زانسم چەنێ لێد دۊرم

غەفار_مورادپووڕ

باڵا چۊ چنار مل چۊ کەلەی قەن

دڵەی پڕ زامم وەلای بیەسە بەن

تو قبڵەو خودای خێیاڵ منێ

ئەر ناز فرووشی نرخ نازد چەن

شەماڵ پێچیایە وەو زوڵفەیل هۊڵە

فریشتەیل سجدەو ماچ دەسێ کەن

هەرچێ هوورییە زوڵفێ کەن شانە

چەپە چەپە گوڵ وە داوانێ نەن

هەۊرات خوەشێ وڵات گردێیە وەر

سووسەن و سوونبووڵ گوڵ دار وەن

ڕەفیقەیل بانە سەر وەخت حاڵم

وەحید خەمینەو فکرێ ئەڕای کەن

وەحید فەڕووخی نەسەب