دوختۆر
وه‌ختى شه‌واتیه‌ى چه‌وه‌یل چنه‌و خه‌و
خه‌یاڵ میوانه دوختۆر وینه‌ى ته‌و
یه دى گلم ده‌ى شه‌وار هه‌رچگ هه‌س
نه ڕێ هاوار هه‌س نه رێ فه‌ریادره‌س
ئاساره‌یل یه‌ك یه‌ك نووڕم ئاوابوین
خه‌یاڵیش به‌یگه‌م وه‌ره‌و بیستوین
له‌سه‌داى ده‌نگ ئه‌ڵڵاهو ئه‌كبه‌ر
له‌خه‌یاڵ تیه‌مه‌و وه‌ل بانگ سه‌حه‌ر
ئیجار چمه ناو باخچه‌ى گوڵستان
گوڵه‌یل چه‌ن ڕه‌نگن دوینمان له‌شان
یه نه‌سرین گوڵه و ئه‌وه‌یش گوڵ شیلان
یه‌كى چنوورگوڵ و چه‌رمگ جوان
یه‌كتر سووسه‌نگوڵ یه‌كتر ئه‌رخه‌وان
گیشتیان زانم خاسن ئه‌را ده‌رمان
زه‌رد ، قه‌رمز، كه‌و سه‌وز و ڕه‌نگاوڕه‌نگ
گوڵاویان شرینه وخوه‌یان شووق وشه‌نگ
دوختۆر هه‌ى هاوار كامیان ده‌رمانه ؟
كامیان تیماركه‌ى ئه‌ى ده‌رد و ژانه ؟
له‌ى بوو گوڵه‌یله من بى خه‌وه‌رم
دوختۆر یه‌و ڕییگ بنه له‌وه‌رم
بڕه‌س وه‌دادم تیماره‌كه ده‌ردم
توام منیش بژیه‌م له‌هواى مه‌ردم
هه‌ر گوڵى وه‌ده‌ردى زانم شفاسه
بوومه قورباند كامیان ڕام خاسه ؟
دوختۆر وه‌سف كرد وه‌ت كامیان گه‌شه
ئه‌و گوڵه ده‌رمانه بووى لاد خوه‌شه؟
ئه‌ول خویندا بووى جووش خوه‌یگن
خه‌یاڵ شه‌وان له دڵد ده‌ركه‌یگن
نه‌ده‌ردد مینى نه‌خه‌یاڵ نه ژاند
بزان كامیانه بووگنه ده‌رماند ؟
من خوه‌م دوختۆرم ده‌رده‌یل گشت زانم
وه‌سفى ئه‌ڕاد كه‌م، هه‌ر یه هابانم
