دو وەهارانە
وهار (١)
م وهارم
تو زەمین
م زەمینم
ئوو تو دار
نە، م دارم تو وهار
عەتر قسیە‌ی خوەش تو،
ئەور شووڕ زوڵف تو،
تام بسکەێ دەم تو،
خوەش‌خوەشان کە‌ش تو، وێشکنێگەم
ناز باڵ چەم تو پێشکنێگەم
.
دە نام زار و زەمین
سەوزمەو کەێ
گەپمەو کەێ
هە وەک خوەت ک گەپیت
ئوو دریژی وەک شەو
مانگ بوێگەێ یا نەوێگەێ
تو بڵنی، جوور یەڵدا
تو گەپی گەپی
چۆ تریوەێ مانگەشەو
هە درەوشی
وەرد ئاونگ
وەر ژە ئاو
د مل وەڵگ وەنێ
تام تۆڕگ دەێ، سەڵامت
رەنگ گوڵ دیرێ، کەڵامت
تو وەک مەخمەڵ ئەوری
تو وەک عەتر گوڵیت
جوور تەم نازک و نەرمی
وەختێ نیشی دە پەڕ یاڵ چیا
جوور وەفری تو
وەفــِر
ئەر بتاوی
ئەر وە وفرئاویش بوی
وە دەر و دەروەن و دەێشت
تو سەفا دەێ چۆ وهار
ک وهاری
تو وهاری
تو وهار
.
تو وهاری
م زەمین
نە، م ِ دارم، تو وهار
عەتر قسیە‌ی خوەش تو،
ئەور شووڕ زوڵف تو،
تام بسکەێ دەم تو،
خوەش‌خوەشان کە‌ش تو، وێشکنێگەم
ناز باڵ چەم تو پێشکنێگەم
وهار ٢
گژە گژ وای شەماڵ
خشەخش وەڵئەمار
شڕ شڕ تاف وهار
دەنگ کەوێ دە ساێ دار
دە نامحەوشە شنەێ پاێ دیاێ
وهار، وهار
لە نوو خشەێ پاێ دیاێ
وهار دیاێ
پرتاڵ نوو کەمە وەر
وێشکمەوە
تەڕتر لە گوڵگەڵاێ تەڕ
نچیڕە دەم
وەرد باخە هەنارە
چکیڕە دەم
وەر ژە سێفەێ قەێ دارە
چۆزە
هە چۆ چۆزەڵەێ گوڵ‌وهارە
خونچیلە چۆگوڵخونچەێ گوڵنسارە
واران وارێ
بوو ِ نمڵچ خاکە
پڕەو دکەێ بێ‌دەنگییەێ وتاخەم
ها دەر کەل
زۆ کە
دەرانە وا کە
م وەرد یەک هەستێ تر ئاشنا کە
ئەڵِس لە نوو
تووز و تەم خەم لادە
تووز و تەمەێ خەم لە سەر خاترەکانم لاوە
شێعرێ بخوەن
شێعرێ چۆ لاوەلاوە
دەنگێ ئەڵاڵ
لەو عشقە بێ‌هساوە
وهار دیاێ
پەپرۆکە سەر دەرارێ
چەپەێ گوڵ کەڵمەس و رۆز دیارێ
وهار، وهار،
گوڵ وەنەوشە دیرێ
هزار، هزار،
عشق بێ‌خەوشە دیرێ
ئەڵس بژەن
بژەن ک کات عشقە
ئەڵِس ئەڵپەڕ
ئەڵپەڕە سات عشقە
بژەن، بژەن
وە جوور جار جاران
بخوەن، بخوەن
وە گەرد نەرمە واران
وهار، وهار
لە نوو شنەێ باێ دیاێ
لە نوو دە سەر کۆچە خشەێ پاێ دیاێ.
• رودوس فەیلی (مستەفا بەیگی)
وهار وهار
وە مەقام شێعرگوورانییێگ فارسی وە نام "بهار بهار" ک هن موحەمەدعەلی بەهمەنییە
