دەرد رووزگار
سەرم سەنڰینه، دڵم چۊ سەنڰه
لە ژێرا نووڕم وەێ ئەور° تەنڰه
ئێ ئەور° وشک° یەێ نم نەواره
ئێ جله کۆانێ هە جــــۊ دەواره
ئێ کـــــــەڕه مییه، ئێ تەپ° تووزه
ئێ چارەێ چەفته، ئێ هاڵوو ڕووزه
ئێ چەو چەو نیەو ئێ تەمە لۊله
ئێ بن° سیەێ گــــــۆڵەم° قـــۊله
ئێ شەو پەژارەێ شەوار° شیمە
ئــــــێ فچ° فاچه، ئێ وڕ° ویمه
ئێ نـــزە نز° لە ژێر° دەمەو
ئێ کزە کز° له وەر° خەمەو
ئەێ ئەور° سیەێ چل ساڵە، ڕەێ وا !!
لە ڕۊ میلکـــــــان° ئێ مــاڵه ڕەێ وا !!
وڵاوا بۊدە چۊ لاف° کۆانه!
لە بان° تەخت° ئێ ئاسمانه
سا خسیدسه کۆتێ لەێ زەۊه!
وا وزارده ئێ خــــۆداێ قەۊه!
نــە چیده ئێ لا، نه چیده ئەو لا!
نه لە وەر° خۆەر گڕێ دەیدەو لا!
وشکو بێ خــەێرو چیەڵو تفە ڕۊ
گێشتێ هڕ° بیف، کۆلێ قاڵ° قۊ
خۆەزێەو گۆم بکەێد وا شوون° نۊند!
بەێ لە خــــۆەرد° خۆەد، ژار° دەرۊند!
گەردەچۊچانێ بخەێ لە باخــد!
تا بچۊچنێ چرەرخو چەرداخد!
شووند بووڕیا لەێ سەرزەمینه!
لەێ سەرزەمیــــن° ناڵەو نفرینه
تا خۆەر ئڵاتاد وە کەڕو فەڕەو
دنیا بپیچێد وە لیسک° زەڕەو
تا هەم لە دنڰ° سازو د° زەله
وڵات بڕشیاد لەێ در° کــــەله
تا لە نوو ئێ دەیشت° کزو کووره
پـڕ بوود لە دەنڰ° دەفو تەمووره
ژنەیل دەس° یەک بگرن وە نازەو
پیایل بکۆتن پا وە شــــــــــاوازەو
دۊەتەیل هەڵقه بەن وە دەورا دەورەو
خـــــــــۆەر ئاخڵە بەێ لە بان° ئەورەو
چووپی بکیشن کۆڕەیل° سەرمەس
پا له جفت° پا، دەس لە بان° دەس
جـەشنو شانازی بارێدەو لە نوو
چەپڵە ڕێزان° قۊخاو کەێوانوو
هە لە بان‌قۆرخ تا خۆەرە تێ‌وڵ
بـژەنو بکۆت° ساز بایدو دێ‌وڵ
ئەو بەخت° بەرز° سێ هزار ساڵه
لە نوو بارەنەو وەێ بنه ماڵـــــه.
بهروز باسمی
