خوه‌زه‌و...!
2013-01-16T08:48:24+00:00
خـوه‌زه‌و گـڕگـڕه‌ێ تـه‌وه‌یـلم بـویای
خـوه‌زه‌و هـساره‌ێ شـه‌وه‌یـلم بـویـای
خــوه‌زه‌و بــزانـم، خــوه‌زه‌و بـزانـی
خوه‌زه‌و له باخان گوڵ ئه‌ڕام باری
خوه‌زه‌و وه‌كوو من بوده بێ مراد
خوه‌زه‌و هاومنووس نه‌نیشێ وه لاد
خـوه‌زه‌و بزانی؛ نه بوشـن ئـه‌ڕاد
دروو نه‌وی قـسیه‌ێ شـیرین و فـه‌راد
یه نـووڕد نـیه‌كه‌م، كـه‌م بـكـه زاری
خوه‌زه‌و له باخان گوڵ ئه‌ڕام باری
خـوه‌زه‌و را قـه‌سه‌م بونیامه‌د وه چا‌و
خـوه‌زه‌و ئه‌حواڵد بژنه‌ویام وه راو
خوه‌زه‌و ته‌ڕزووان، قژكاڵ و زڵف خاو
خوه‌زه‌و نـه‌ونـه‌مام بـاڵا چـوی لاولاو
وه كونـیـه‌ت نـه‌زانی قـسیه‌ێ دڵداری
خوه‌زه‌و له باخان گوڵ ئه‌ڕام باری
خوه‌زه‌و له‌و رووژه‌و دیده‌د له دیـده‌م
خـوه‌زه‌و شـه‌تـاو نـه‌و گـل و گـلـیـنـه‌م
بـێسـتون تـه‌ك دا له سـه‌در سـینـه‌م
خوه‌زه‌و فه‌رهـادێگ ورد كه‌ێ به‌ردینه‌م
خوه‌د بـكه د‌‌رمـان ده‌رده‌گه‌ێ كـاری
خوه‌زه‌و له باخان گوڵ ئه‌ڕام باری
خوه‌زه‌و لێت دویر نه‌و دڵـه‌گه‌ێ وێڵم
خوه‌زه‌و رزگار بووم، ئه‌سیرم، دێڵم
خـوه‌زه‌و سێوه‌رت بـووده سـه‌رخێڵم
مـنیـش هـاوڕه‌گـه‌ز كـوڕه‌یـل ئـێڵـم
یـه راز دڵـمـه، ئـه‌گـه‌ر دڵـداری
خوه‌زه‌و له باخان گوڵ ئه‌ڕام باری
