خه‌م تا ئیره‌و به‌س
زانم له‌و ڕووژه سه‌رم هاته‌و بان
تن هاوڕازمید بى شك گومان
چه‌نى چه‌ن ساڵه بویده وه دووسم
سقانم سوزیا دى له‌ناو پوسم
چه خه‌یاڵده‌و چه تواید بكه‌ید
له‌یه زیاتر, دى كووسم بخه‌ید
ئه‌یه چه‌ن ساڵه سه‌رلیم شیوانید
ڕه‌نجد بیوه‌ر بوو, ماڵمیش ڕمانید
خوسه‌و ماجه‌را كردیده وه‌به‌شم
وه‌هه‌ركوا چم هایده تركه‌شم
دووس ئه‌زیزم بردید له ده‌سم
چوینه پیم كردید چمان بى كه‌سم
كردیده‌م وه‌ئه‌ڤداڵ له‌گووشه‌ى شاره‌یل
به‌دناویش بویمه لاى قه‌وم وكاره‌یل
زه‌بوونم كردید و جگرم قرچانید
له‌لاى ناكه‌سه‌یل زه‌نگمیش زڕانید
به‌و دى واز لیم بار وه‌زووان شیرین
سه‌برم نه‌یشتیده وه‌لید چگمه‌و قین
وه‌گورز ئه‌رجن كه‌فمه گیاند
ئازایى نیه‌یلمه له‌ش و سقاند
دنیا گشت گوێڕیا دى نه‌ما ده‌ورد
مه‌ردم ڕه‌سیه‌و له جه‌فا و جه‌ورد
له وه‌رچه‌و مه‌ردم قووشه‌ند شكیا
قه‌یزنه بویده له دونیا و بنیا
شووند لام نه‌ما نه‌وه ده‌ورمه‌و
بچوو ئه‌را خوه‌د شوینى تر بوینه‌و
