خــوه‌زه‌و ئـيـجـاره ڕا شـنـگال بواری
بــوار واران وڵات خـه‌ڵـپــانِ خــۊنـــه
له ميلكانم له نـوو هه‌م گه‌رمه‌شينه
بوار بيل ئاسمان سۊله‌ێ چه‌وێ باێ
ئه‌ڕا ئـاخـرشـه‌ڕی ئـی سـه‌رزه‌مـينه
بـوار واران له‌نـوو كـووچـه‌و كوته‌ڵكوو
له‌نوو ئاسوو وه‌ره‌و مان و نه‌مان چوو
بــوار واران مه‌گه‌ر نيه‌وينی چ باسه؟
وڵاتِ زه‌رده‌خـــوه‌ر دێــرێ فـه‌نـا بـوو
بـوار واران لـه‌نـوو هــه‌م كـوردقـڕانـه
وڵاتِ بـــێ وڵاتـــان پـــڕ لـــه ژانـــه
بــوار واران لــه‌نــوو ته‌نياێ ته‌نيـايـم
له‌نوو ديــواره‌گان چـه‌وێـان بـه‌سانه
بــوار واران ت ئــاو وه‌ی ئــاگـرا كـه
ره‌حـمـێ وه ڕووڵه‌ێ ژێـرِ چادرا كه
بــوار واران لــه ئــی تاوسانِ ده‌رده
وه‌ره‌و ئــاواره‌گـان ده‌سـێ دڕا كـه
بــوار واران، ئـه‌گـه‌ر ئمشه‌و نه‌واری
وه‌مـانـاێ بـێـده‌نگيده‌و شه‌رمه‌زاری
لــه‌دڵـم ده‌رنـيـه‌چـوو داخِ هه‌ڵه‌بجه
خــوه‌زه‌و ئـيـجـاره ڕا شـنـگال بواری
