تن و من

پاییز  پەێ  زەرد  وەڵنگڕێژان  منم 

ڕفت    پێژوار   وەر  زمسان  منم 

ترنگە ترنگ  شەونم شەوبوو تنی 

لێخناو   پاێ  لاوەگەێ واران    منم 

گارە گار  کەوک   سفتەێ  سوو   تنی 

دڵتەنگی ئاواێ     قڵا‌قیران منم

گەیڵ  گەێشت   باخ دڵداری    تنی

داوەڵ  یەێ   پاێ  مەرەزەێ  خان منم 

پاێ نەرام  لیو تیەنی ‌ترنگاو تنی 

ئەزرەتی یەێ‌ کەوک خوەش‌ فِرمان منم 

هونکی   چۊزەیل   تازە   ڕەوز تنی 

داخ  لالەێ   وەیل بێ  باوان      منم 

نۊر  ئەقراج کوڵەنجەێ  وەۊ   تنی

ئەور شەۊ  دڕیاێ    سیە‌داوان   منم 

عەترەگەێ  پۊنگەێ کمارِ چەم   تنی

بوو مەنەێ  قەوزاخ   بان   سان  منم 

موسقی   سەرسەونز  سینێ  ئاو تنی

هوورەگەێ  دڵگیر  یەێ‌ شووان  منم 

قاوە   سینی   سیورەت   شیرن  تنی

شەو  دڵ فەرهاد بێ  تاوان  منم

ئێران عەلیکەرەمی