بی کەسیەگەی عەفرین
عوسمان حەمو
لە عەفرین دەرچیان
و هەر دوو گام جاریگ وەرەو دویا نووڕستیان
شایەت چشتیگ ئاڵشت بوود
تا کووڵەیل خوەیان فڕە بیەن، و بچنە دویا
شایەت وە توانای تواناداریگ
کەسیگ وە پەرچەم چەرمگیگ ئەرایان هاوار بکەێد
و وەپیان بووشێد؛ بانە دویاوە، ئاسوودە بویمن، بانەو وەرەو ئاوایەیلدان
گشت ئەوانەگ لە عەفرین دەرچگن
بڕ بر، و بان پای خوەیان
شەوخەف ئیسفەنج سووک و پەتو گردنەسە کووڵەو، جانتا و کیسەی نایلۆن، چشتە سووکەگانیان هالە ناویان
هەر دوو گامیگ تکەپا دەن
و روی وەرەو دویا کەن
چمانی چشتیگ هەس چڕێدەیان
چمانی دارە زەیتوونەگان
چمانی سەنگەگان لە بنەوای ماڵەکان چڕنەیان
چمانی ئەو بسمارەیلە ک وێنەیل باوگ وباپیریان وەپیان کردنە دارەو، وەتەنیا لەناو دیوارەگان هاوار هاتنەوەیان کەن
چمانی ئەو گوڵەیلە وەبی ئاو وەجی هیشتنە
چمانی گورانیەگان «جەمیل هورو» و «عەدنان دڵبڕین» ک جوور لاولاو داوەزیانەسە بان ئاوایەگان وەناویان چڕن
«سەودا سەودا ئەز بریم، ری نەما بکووڤا بریم، سەبر نەما بکووڤا بریم»
چمانی بێڵ و تیشە و قوڵنگەگان هاواریان کەن
و ئەوانەگ لە پشت ماشین «پیک ئاب» سوار بوینە
ئەوانەگ لەبان شەوخەفەیلیان لە پشت «تراکتۆرەگان» نیشتنە
گشتیان روی کردنە دویا، وەرەو بان ریەگە
تیر نووڕنە باڵای عەفرین
گشت ئەوانەگ دەس مناڵەیل گردنە، و کیسەی پلاستیک وەو دەسەگە هەڵگردنە
دوو گام ری کەن، ئیجا وەرەو پشت وەرەو عەفرین نووڕن
تەنانەت خودایش
دوو گام لە ئاسمانەوە ری کردیاد
و نووڕستیادە پشت
هەنای ئەویش وەگەرد رێنەگەی لە عەفرین وەرەو بیاوان وڵبوینی دەرچگ.
*وەرگێڕان/ شه‌فه‌ق نیوز - کەنعان حاتەم
