بەزم و رەزم ژنان کووبانی

بەزم و رەزم ژنان کووبانی

بهروز یاسمی

 له شه‌ماڵا بوو هه‌ناس گوڵ تیه‌ێ

له دووره و‌ ده‌نگ ساز دێوڵ تیه‌ێ

ده‌نگ دێوڵ تیه‌ێ بیلا بژه‌نن

به‌رگ ئازیه‌تی له وه‌ر بکه‌نن

بیلا بژه‌نن ئی به‌زمه خوه‌شه

ئی بەزمه دوماێ ئه‌و ره‌زمه خوه‌شه

بیلا بژه‌نن له‌و کورده‌ماڵا

وا ده‌نگێ بارێ له لا شه‌ماڵا

 بیلا بخوه‌نن بیلا بخه‌نن

بیلا هه‌ڵپه‌ڕن بیلا بژه‌نن

وه په‌نجه سێ پا، وە سینگ لەرزه

شاواز شاواز ِ ئه‌و باڵابه‌رزه

بیلا ده‌نگێ باێ ئی ده‌نگه خوه‌شه

ئی ده‌نگه دوماێ ئه‌و جه‌نگه خوه‌شه

خوه‌زه‌و لا بگرێ له‌و بنه‌ماڵه

شنه‌ێ شه‌واره‌ێ ئی واێ شه‌ماڵه

تا وه لا بارێ بوو ئه‌و به‌ساته

ده‌نگ ِ دڵنشین ئه‌و سوور و ساته

شاواز شاواز ِ هه‌ر چێ چاو‌ مه‌سه

هه‌ر چێ چاو مه‌س ِ تفەنگ وه ده‌سه

هه‌واخواێ نه‌مرێ ئه‌و هه‌مه‌که‌سه

ئه‌و هه‌مه‌کەس ئه‌برو په‌یوه‌سه

ئی ساز و به‌زمه وه سووره و خوه‌‌شه

ده‌نگ ِ دێوڵەو له دووره و خوه‌شه