پاتشا و دەوریش
شەوێ مانگەشەو ئاساره واران
دڵ وێنەی دەوريش بێ پەنای شاران
خەیاڵ تەرف تۊن هەناس پڕ له ئاخ
دەرۊن چک وچووڵ جور دەێشتەی ئيلاخ
نه سروەی شەماڵ نه نەسيم شەو
نه کزەێ بوڵبوڵ نه دەنگ شاقەێ کەو
شەوار ئەڵداۊدن دەوارێ له بان
نەرمه زقمێ وەر داۊ له جەهان
مەردمان کش مات گشت شەکەت خەو
بی خەوەر له کار ئاسمان کەو
پاتشاه و دەوريش وه بێ دەنگ کەفتۊن
له ناو چەرداخ و کاخێان خەفتۊن
دەوريش ژێرى زەۊ بانێ ئاسمان
نه خەوف و خەیاڵ نه پەژارەێ نان
نه فکر چەپاو له ناو سەرێ بۊ
نه شەمشێر زەڕ له کەمەرێ بۊ
نه له فکر سوو نه دڵتەنگ نان بۊ
نه له خەياڵێ سەوداێ جەهان بۊ
پاتشا تا سوو وسا وه پاوه
تا شەفەق پەردەێ شەوەکيان داوه
تاسوو لە فکر جەهان گیری بۊ
لەسەودای خارەت پەێ ئەسیری بۊ
تاسوو حساو کرد گەنج خەزانە
کام وڵات خەراج ئمساڵ نیانە
کامین شار خاسە زەۊ و حاڵیان
سکەێ شاعەباس ها لە ماڵیان
لەشکەر بکیشم تا کشوەر شام
خەراج لە شاهان ڕوومی م بتوام
ئەگەر لەشکەرێ بنەم لە کەمین
وە شەوێ بگرم سەرزەمین چین
سپاێ کل بکەم تا وڵات شام
باج سەد ساڵە لە لیان بتوام
ئەگەر گشت ئاڵەم لە فەرمانم بوو
شیرین خەزاڵان هاوزووانم بوو
ئەر شەراو بخوەم م لە جام زەڕ
شەمشێر یاقوت بوەسم لە کەمەر
یاقوت یەمەن بار بکەم بارم
بت خانەێ هندی لە زەۊ درارم
قماش کشمیر م بکەم لە وەر
تاج کەێ قوباد م بنەمەو سەر
ئەگەر م داشتووم گەنج بێ پایان
وە ڕاحەت خەفم بێ دەم بێ زووان
پاتشا بێ خەوف سەڕ نا لە زەمین
ئەجەڵ بێ کرچە درات لە کەمین
گیان پاتشا وە بێ خەوەر سەن
جەسەێ پاتشا لە ناو کاخێ مەن
پاتشا تا ڕووژ سەوداێ جەهان داشت
شەوەکی نە گیان نە دی زووان داشت
پاتشا تا سوو فکر دونیا کرد
وە بێ کەس لە بان تەخت شاهی مرد
هناێ خوەر ئڵات له بەرزى کاوان
سکەێ زەڕ هاتەو له ناو ئاسمان
چەرداخ دونيا ڕووشن بۊ له خوەر
ترۊسکەێ شەوقێ جەهان گرتە وەر
هناێ مەلەوەر هيز گرتن له خەو
لە بان لاوردن لاف سێەێ شەو
که موتەر باڵ گرت له ناو چروو تەڕ
دارسمەک هاتەو ڕا تاش کەمەر
فيسقەو مەلۊچگ دراتن له ماڵ
پەخش بۊ له دەروەن کزەێ واێ شەماڵ
سێەقاژ نيشتەو له ساێ دار وەن
گۆڵ تنگس چەقی له قۊلی دەروەن
دەوریش ئەڵسا جەهان گەردی کرد
شنەفت پاتشاێ لە ناو کاخێ مرد
جەلال کووهى
