ئەڕا مێهران (مەنسوورئاوا)
دە بانِ کووڵِگ، دووربین دامە چەم
هەوا داگرتبۊ کەمێ تووز و تەم
وە یەواش یەواش دووربین دامە گەشت
خڕێ دام وە بان نەر و دەر و دەشت
وەیەکجار وسا دووربین دە دەسم
بڕیا دە سینِگ، بارِ نەفەسم
ئاهێ جگِرسووز دەرچگ دە دەسم
ۊ وە لێڵاۆە دووربین دە چەمم
ئەو کوومە کوومە ماسە یا شنە؟
یا مێهران عەزیز شارەگەی منە
خودا ئەو دۊِ خوەڵەکوانە
وەر ئەو ئاسمان کیشێ زوانە
سخانِ سووزیاگ جەسەی مێهرانە؟
پارەی دە جگر گووشەی ئێرانە
یە ئەڕا جوومەی مێهران دڕیاگە
ملوانەی ملێ دە چە بڕیاگە
مەر چارەنویس دەسێ لڕیاگە
نامێ دە نامِ شارەیل سڕیاگە
خودا یە چۊنە ؟ ئاخِر ِ دنیاس
یە "سەی حەسەنە" بێ‌کەس و تەنیاس
نەخلەیل ِ سەرسەوز مەنسوورئابادە؟
دەیجوور پەریشانِ سەرپەنجەی بادە؟
ئەوە گاوییە؟ مات و حەیرانە
ئاسمان دە نامِ سینەی دیارە
ئەو چشتِ بوورە، دەو دەشتێ دەوێ
منێ وە بِنجگِ سەرِ پرچِ کەوێ
یا رەب! کەنگڵاشگ یاگەر خەشێگه؟
یا کەرگێوەی ولِ مازگ رەشێگە؟
یاگەر واوەمەنەی دە گوردانێگە؟
یا ماسکِ تەنیای سەرگەردانێگە؟
کەم کەم سیا ئەورێ ئاسمان داگرت
شار ِ چک و چووڵِ وێرانە، ساگرت
نەعرەی دا وە دڵ و کیشا غەریوە
تەک دا وە "کووڵگ" و دەس نا گریوە
دەو رۊ ئەسرِ ئاو ، دەی رۊ ئەسرِ چەم
رۊ هەر دو شیشەی دووربین بۊ وە تەم
وتم: "یا ئەخی!"، یە دووان وە لات
هێمان خۆ شەوە، تاگەر خوەرهەڵات
*حشمەت مەنسووری ئیلامی
