ئەڕا «مناڵه‌یل شنگال»
هه‌کڵ مه‌کڵ کڵکافه
زڵفه‌یل بافه بافه
ڕزێدن و کزێدن
ئه‌وریشمه سزێدن
خه‌وەر خه‌وەر خه‌وەر هات
خه‌وەر له هووز شه‌ڕ هات
ئه‌ناره‌گان که‌مەو بۊن
چناره‌گان خه‌مەو بۊن
مزگانی به‌ن وه باخم
باخه‌یڵ پڕ له داخم
خه‌وەر خه‌وەر خه‌وەر هات
هه‌م تێشێ و ته‌وەر هات
هەێ خوه‌ر بچوو ت مه‌وره‌و
بچوو وه پشت ئه‌وره‌و
ته‌رچگه گووشت گیانم
فەره وشگه زووانم
خه‌وه ر خه‌وەر خه‌وەر هات
گوله‌ێ خەزه‌و له وه‌ر‌هات
نه ئاو بی و نه شه‌ت بی
کوچگ بی و هه‌ڵەت بی
نه داڵگ و نه باوه
نه لاوه لاوه لاوه
خه‌وەر خه‌وەر خه‌وەر هات
یەێ مه‌ژمه پڕ له سه‌ر هات
قه‌ڵایل شووم شه‌و هات
گوله وه تاف دەو هات
سەرینمان له سه‌نگ بۊ
نه‌سیومان تفه‌نگ بۊ
خه‌وەر خه‌وەر خه‌وەر هات
تاش کۊیه و که‌مه‌ر هات
کوومه کوومه له‌شمان
گوله بۊیه به‌شمان
گوله وارێ وه خشێ
گوله باوگ م کوشێ
خه‌وەر خه‌وەر خه‌وەر هات
له‌ش باوگم له ده‌ر هات
هه‌کڵ مه‌کڵ کڵکافه
له‌شه‌یل بافه بافه
دونیاێ که‌ڕو کوورمان
دونیاێ زه‌ڕو زوورمان
خه‌وەر خه‌وەر خه‌وەر هات
هقوقه‌گه‌ێ به‌شەر هات
