چه‌وپووشى له هه‌ڵويست "رۆبن هۆد" عراق وه ئوميد نزيكه‌وبوين له‌لى
شه‌فه‌ق نيوز/ رووژنامه‌ى "نيويۆرك تايمز" دوياى سه‌ركه‌فتن "سائرون" وه سه‌رۆكايه‌تى موقته‌دا سه‌در له هه‌ڵوژاردنه‌يل په‌رله‌مانى عراقى، نوڕسته‌سه هووكار سه‌ركه‌فتن پياويگ ئايينى شيعه و گرنگى ئى په‌ره‌سه‌ندنه وه نسبه‌ت ئه‌را وڵاته‌گه.
رووژژنامه‌گه له راپۆرتيگ ئاماژه وه ئه‌وه كردگه ك هه‌ڵويسته‌يل سه‌در له ژيان سياسيى ئاڵشتكاريه‌يل بنه‌ڕه‌تييگ ديه، ئه‌ويش له‌ساێ په‌ره‌سه‌ندن بارودوخ له‌ناو وڵاته‌گه، باس له‌وه‌يش كردگه ك روێداگه‌يل دڵته‌زن له وڵاته‌گه‌يش به‌شدار بويه له كزه‌وكردن شيواز تايفى ئه‌را ژيان سياسى ك يه‌يش ده‌رفه‌ت دا سه‌در له سه‌ركرده‌يگ ميليشايى ئاڵشت بدێ ئه‌را كه‌سيگ خاسسازيكار و نيشتمانى له‌ناكاو عراقى.
راپۆرته‌گه وتگه: سه‌در ره‌سيه‌سه زنجيره هاوپه‌يمانييگ سياسى له‌ناكاو له‌ناو وڵاته‌گه، ك ئيسه‌يش پشتگيرى شيعه‌و عراقيه‌يل وه‌ده‌سهاوردگه له‌وانه‌گ مه‌يل له كه‌مه‌وكردن ده‌رئه‌نجامه‌يل قه‌يران ئابوورى ديرن و ليبراليه‌يل و رووشنهويره‌يل و چه‌په‌يل و نوخبه‌يگيش له پياوه‌يل كار سنى.
رپۆرته‌گه ئويشێد: سه‌در ده‌س له لايه‌نگه‌ره‌يل وه‌رينى له ته‌هران هاورد و سه‌ركه‌فتن هاوپه‌يمانه‌گه خزمه‌ت نه‌كرد له به‌رژه‌وه‌ندى ئيران و وڵاته‌يل يه‌كگرتگ، وه‌لێ ئه‌وه بوى شيوعيه‌يل و ديموكراسيخوازه‌يل كۆمه‌ڵايه‌تى و ئاژاوه‌چيه‌ێل موفاجئه‌يگ بوى ئه‌رايان له سه‌در ك نيشانه‌يگ بدێ ئه‌را خاسسازى ك وه دريژايى ساڵه‌يل جه‌نگ ئه‌را ئه‌و خاسسازيه كرديان و سه‌ركرده‌يگ مه‌ردمى ك وڵاته‌گه هه‌وه‌جه وه‌پێ داست له ماوه‌ى ئاڵشتكاريه‌يل بنه‌ڕه‌تى سياسى.
سه‌در وه‌رجه هه‌ڵوژاردنه‌يل له ديمانه‌يگ ته‌له‌فزيۆنى ئاشكراى ئه‌وه كرد ك ئامانجى ره‌سين ته‌كنۆكراته‌يل ئحترافيه، نه‌ك لايه‌نگره‌يل سه‌ر وه حزبه‌يل دياريكرياێ ئه‌را پۆست سه‌ره‌كى له حكومه‌ت وه ئامانج دامه‌زرانن ده‌زگايه‌يل حوكم ك خزمه‌ت وه مه‌ردم بكا نه‌ك وه هيزه‌يل سياسى.
جۆست هيلترمان وه‌ريه‌وبه‌ر به‌ش خوه‌رهه‌ڵات ناوين له كۆمه‌ڵه‌ى قه‌يرانه‌يل ناوده‌وڵه‌تى ئه‌را رووژنامه‌گه وتگه، سه‌در تويش سه‌ختيه‌يل فريه‌يگ ئه‌ياد له جيوه‌جيكردن ئه‌جنداى خاسسازى، له‌ڕوێ ئاست ناوده‌وڵه‌تييش سه‌در ك هه‌رچه‌نى ره‌خنه‌يل تونيگيش له وڵاته‌يل يه‌كگرتگ گرت، وه‌لێ تويه‌نست پيه‌ڵ وه‌ل هاوپه‌يمانه‌يل وڵاته‌يل يه‌كگرتگ له جه‌هان عه‌ره‌بى دامه‌زرنێد، له‌وانه‌يش وه‌ليعه‌هد سعودى محه‌مه‌د بن سه‌لمان. وه‌ل ئه‌وه‌يشا دبلۆماتكاره‌يل له چه‌ن ده‌وڵه‌تيه‌و وه‌تايبه‌ت له‌و ده‌وڵه‌ته‌يله ك سه‌ربازه‌يليان وه‌ده‌س لايه‌نگره‌يل سه‌در كوشيان ديدار وه‌ليا ساز كردن.
نيويۆرك تايمز وت: ئه‌و ده‌وڵه‌ته‌يله ئاماده‌ن چه‌وپووشى له‌و روێداگه‌يل بكه‌ن وه ئوميد نزيكه‌وبوين له سه‌در، ئه‌ويش له‌وه‌ر ناگيرى له ئيران ئه‌را ئه‌وه‌گ نفوزى له عراق زيايه‌و نه‌كا.
راپۆرته‌گه يه‌يش ده‌رخست ك سه‌در پيشكه‌فت وه‌ره‌و پله‌ى يه‌كه‌م له وازى سياسى عراقى و له هه‌مان وه‌خت وه رۆبن هۆد تاريفى كردگه ك فه‌رمان داگه لايه‌نگره‌يلى بڵاوه بكا له به‌غداى پايته‌خت ئه‌را دابه‌شكردن خوارده‌مه‌نى له‌بان فه‌قيره‌يل و مقه‌يه‌تيكردن له له هاووڵاتيه‌يل ك يه‌يش له‌لايه‌ن ئه‌مريكاوه وه كرده‌وه‌يگ دوشمنكارانه تاريف كريا.
سه‌در له وتاره‌يلى زووان تون ده‌رهه‌ف وه وڵاته‌يل يه‌كگرتگ هاورده كار و داوايش له لايه‌نگره‌يلێ كرد په‌لامار هيزه‌يل داگيركه‌ر بيه‌ن، ك يه‌يش له‌يوا له جۆرج بۆش كوڕ و سه‌رۆك ئه‌وساى ئه‌مريكا كرد ئه‌و سه‌ركرده‌ى شيعه وه گه‌وراترين دوشمن واشنتۆن له جه‌هان تاريف بكا شان وه‌شان ريكخرياگ قاعيده.
راپۆرته‌گه ئاشكراى كردگه ك سه‌در له هه‌ڵويسته‌يل وه‌رينى پاشگه‌زه‌و بوێ دوياى ئه‌وه‌گ ريكخرياگ داعش ده‌سگرته بان روێوه‌ر فريه‌يگ له عراق و لايه‌نگره‌يليشى شان وه‌شان هيزه‌يل حكومى ك پشتگيرى ناوده‌وڵه‌تى داشتن جه‌نگ دژ ئه‌و ريكخرياگه كردن ك هه‌رچه‌نى 215 كه‌س له چه‌كداره‌يل سه‌در كوشيان و زياتر له 600 كه‌سيش زه‌خمدار بوين له‌وه‌خت جه‌نگ وه‌ل هيزه‌يل ئاسايش له به‌سره له‌ساڵ 2008.
وه‌ل ئه‌وه‌يشا هيمان تائيسه‌يش مه‌ردمان سنى وه وشداريه‌و نوڕنه سه‌در، وه‌لێ فريه‌يگ له‌ليان ده‌نگ له به‌رژوه‌ندى هاوپه‌يمان حه‌يده‌ر عه‌بادى سه‌رۆك وه‌زيره‌يل دان، له‌وه‌ر ئه‌وه‌يش شايه‌ت ته‌مسيل دامه‌زرانن هاوپه‌يمانييگ حكومى له‌لى بكه‌فێده‌و ك هه‌ردوگ فراكسيۆن سه‌در و عه‌بادى بگرێده‌و له گاميگ وه‌ده‌سهاتگ وه‌ره‌و له‌هويره‌وبردن ناكووكيه‌يل تايفى له‌ناو وڵاته‌گه.
