وە چەوپووشی واشینتۆن.. راپۆرتیگ ئەمریکی: حکومەت نوو عراق نزیکترینە لە ئیران
شەفەق نیوز/ مۆنیتۆر ئەمریکی مەزەنە کرد پەیوەندی زیاتر و نزیکتر ناوبەین حکومەت نوو عراق وە سەرۆکایەتی محمد شياع سودانی وەگەرد ئیران بوود، وەچەو حکومەتەیل وەرین، و شایەت واشینتۆن چەوپووشی لەوە بکەێد وەخاتر بەرژەوەنی جەهانیی ئەرا وزە.
لە سەرەتا ئەو راپۆرت ئەمریکیە ک ئاژانس شەفەق نیوز ئەڵگەردانی کرد، وت: چوارچیوەی هەماهەنگی سودانی رەسانە دەسەڵات، و باس ئەو هشکایی سیاسیە لە مانگەیل گوزەشتە کرد ک هیشت سەدریەیل دەس لە پەرلەمان بکیشن، و تیش؛ ئیران وەشان هیزەیل چوارچیوەی هەماهەنگی وسیا تا حکومەت دروس بکەێد.
وتیش: دەسکیشانەوەی سەدریەیل دەر ئەرا چوارچیوەی هەماهەنگی واز کرد تا حکومەت دروس بکەێد ک دەرفت نوویگ دادە ئیران و هاوپەیمانەیلی تا دەسەڵات بەغداد وەدەس بگرن، و ئیرانیش وئاشکرا لەی حکومەت نووە رازیە، ک حەسەن سەمی فەرماندەی سوپای پاسدران ئیران باس شکست ئەمریکا لە ناوچەگە کرد، ک تەقەلای دروسکردن حکومەت لەلایەن ئەمریکا نەڕەسیە ئامانجی، و دەسخوەشی لە دەور ئیران کرد لە دروسبوین حکومەت بەغداد.
هەمیش محمد کازم ئال سادق باڵیۆز ئیران لەلای بەغداد ک لە ٣٠ تەشرین یەکەم سەردان کوتپڕیگ ئەرا سودانی کرد و وەناو ریبەر ئیران پیرووزبایی لەلی کرد و پاڵپشتیکردن ئیران ئەرا ئی حکومەت نووە نشان دا.
هەرلیوا، راپۆرتەگە وتیش: سودانی خاسترین کاندید بوێ لەلای هیزەیل لایەنگر ئیران لە عراق وەتایبەت حەشد شەعبی، و نزیک بوێ لە هەردوگ سەرۆک وەزیر وەرین نوری مالیکی و حەیدەر عەبادی، و لە چەن پۆستیگ وەزارەتی بوی.
وەگەرد ئەوەیش، حکومەت نوو ئەندامەیلیگ لە حەشد شەعبی یا کەسایەتیەیلیگ نزیک وە حەشد هاناوی، لەلیان نەعیم عەبودی ک وەزیرە و قسەکەر فەرمی وەناو عەسائیب ئەهل حەق بوی، و هەمیش ئەحمەد ئەسەدی ک وەزیرە ئەویش قسەکەر وەناو حەشد بوی.
وەگەرد ئەوەیش، راپۆرتەگە باس عەبدولەتیف رەشید سەرۆک نوو کۆمار کرد، ک یەکێتی کاندیدی کرد، وتیش؛ یەکێتی پەیوەندی قایمیگ وەرد حکومەت ئیران دیرێد.
ئەراوە راپۆرتەگە نووڕێد ک ئی حکومەت نووە لە عراق ئارەزوو گەورەیگ دیرێد ئەرا بتەوکردن پەیوەندیەیل وەرد ئیران، وە پیچەوانەی حکومەت وەرینی ک نزیک بوی لە پەیوەندیەیل ناودەوڵەتی و هاوسایل عەرەو جویر ئوردن و میسر و سعودیە.
راپۆرتەگە دیاری کرد ک ئی پەیوەندیە لە گردەوبوین سودانی وەرد باڵیۆز ئیران دیار دا، ک دووپات لە گرنگی هاوکاری و هەماهەنگی ناوبەین عراق و ئیران کردن، و راپۆرتەگە مەزەنە کرد ک ئیران ئەوەسا زوور تیارێد تا سکەی ئاسن ناوبەین عراق و ئیران تەواو بوود، تا بیلێد ئیرانیەیل برەسنە کناراو دەریای ناوەڕاس لەڕی عراق ئیجا سوریا.
راپۆرتەگە وتیش: ئیران توەنێد بیلێد عراق هەر پشت وەخوەی بوەسێد لە بەرهەمکردن کارەبا، لەجیای ئەوە ک بیلێد سەرچەوەیل وزەی هەمەڕەنگ بوون، هەکاتی ئەو تەقەلای حکومەت وەرینە ک خوازێد کارەبای عراق بوەسێدە دەوڵەتەیل خەلیج و ئوردن و میسر.
راپۆرتەگە لە کۆتایی وت: حکومەتی نزیک لە ئیران توەنێد قاچاغی نەفت ئیران زیای بکەێد و ریەیلیگ واز بکەێد تا زوور ئەو سزای جەهانیە لەبان ئیران سووکەو بوود، وتیش: ئی چەوپووشیە هیلێد نەفتیگ زیاتر بڕەسێدە خوەرئاوا، لەسای ئی قەیران وزە.
